Prokuroria e Përgjithshme reagon për rastin e Llallës



Prokuroria e Përgjithshme reagon për rastin e Llallës

17:52 16/02/2018

Në Shqipëri, Prokuroria e Përgjithshme nuk i dha një përgjigje të prerë kërkesës së

Zërit të Amerikës

për të mësuar nëse do të ndërmerret apo jo ndonjë veprim ndaj ish-Kryeprokurorit Adriatik Llalla, pas vendimit të Departamentit Amerikan të Shtetit, për t’i ndaluar atij hyrjen në Shtetet e Bashkuara për shkak të përfshirjes në raste të mëdha korrupsioni.

“Prokuroria e Përgjithshme e Republikës së Shqipërisë i jep përparësi integritetit moral dhe profesional të zyrtarëve. Populli shqiptar pret dhe meriton që zyrtarët të punojnë me ndershmëri dhe integritet në të mirë të interesit publik

”, thuhet në përgjigjen e Prokurorisë së Përgjithshme ndërsa shton se ky institucion

“u jep mbështetjen e plotë të gjithë prokurorëve që punojnë me përkushtim, dinjitet dhe integritet”

e se

“gjithashtu mbështet qëndrimin për ndëshkimin e cilitdo që cënon parimet e Shtetit të së Drejtës”.

Rasti i zotit Llalla është i pari i një zyrtari të lartë shqiptar ndaj të cilit Shtetet e Bashkuara marrin sanksione të tilla. Javën e shkuar, ish-Kryeprokurori u tërhoq nga e drejta për të qenë gjykatës në Apel, duke preferuar të mbetet jashtë sistemit të Drejtësisë. Një vendim, i cili solli sot dhe ndërprerjen e procesit të rivlerësimit të nisur ndaj tij.

Duke komentuar lëvizjen e pak ditëve më parë të zotit Llalla, Ambasadori amerikan në Tiranë, Donald Lu u shpreh se “

tërheqja nuk i shfajëson këta ish-zyrtarë nga përgjegjësitë e mundshme penale për korrupsion apo shpërdorim detyre. Ata që kanë frikë nga Vetting-u, duhet të kenë frikë dhe nga hetimet e pashmangshme penale”,

theksoi Ambasadori Lu.

/Zëri i Amerikës



Të ngjashme