Vëzhgim në qytetet kryesore të vendit
Vendimi për mbajtjen e maskës është respektuar nga pjesa dërrmuese e qytetarëve të Elbasanit.
“E mban gjithë bota, pse mos ta mbajmë edhe ne. Është për të mirën tonë. Jo se e thotë Edi Rama po kushdo që të jetë maska duhet mbajt”.
“Duhet vendosur, mbrojmë veten”.
Të paktë janë ata që nuk i janë bindur Aktit Normativ, për të cilët Policia e Elbasanit ka vendosur gjobat e para ose në raste kundërshtimi ka bërë shoqërime në komisariat.
E tillë është situata edhe në Durrës. Qytetarët duken të bindur ndaj vendimit të qeverisë, për të përdorur maskat edhe në ambientet e jashtme.
Një nga qytetet me numrin më të madh të të prekurve nga Covid pas Tiranës, edhe Shkodra i është përgjigjur pozitivisht rregullit të ri.
Efektivë të policisë kanë zbritur në terren në monitorim të situatës, teksa në ditën e parë janë treguar edhe tolerant me abuzuesit.
Edhe në Korçë, të rrallë ishin qytetarët që kishin dalë pa maskë.
Ata shprehen se kanë vendosur të respektojnë urdhrin e dhënë me bindjen se maska të mbron, jo nga frika e ndëshkimit me gjobë.
“Për të mbrojtur nga virusi, nuk dal pa maskë”.
“Tashi neve na mbron, nuk është halli i gjobave”.
Zbatimi i Aktit Normativ po monitorohet në terren nga patrulla të policisë së rendit dhe asaj bashkiake.
Tv Klan
