Mbledhje me bankat për kreditë e buta

Mbledhje me bankat për kreditë e buta

13:02 01/04/2020

Rama: Zgjerojmë paketën financiare për Prillin

Kryeministri Edi Rama ka zhvilluar një mbledhje online me të gjithë drejtorët e bankave të nivelit të dytë dhe Guvernatorin e Bankës së Shqipërisë.

Qëllimi i mbledhjes ishte vënia në funksion e paketës financiare për kompanitë e mëdha që nuk ushtrojnë aktivitetet dhe kanë vështirësi për pagesën e punëtorëve.

Garancia sovrane që do të japë shteti, mundëson uljen e riskut për bizneset që do të marrin kredi apo overdraft për pagat e punonjësve duke përfituar një interes të ulët që bankat do të ofrojnë për ta.

Edhe në një njoftim të Bankës së Shqipërisë thuhet se u diskutua mundësia për ta shfrytëzuar atë sa më tepër, me një qasje sa më pozitive, fleksibël dhe proaktive nga ana e sektorit bankar. Qëllimi është që të sigurohet përfitimi i sa më shumë njerëzve, duke qenë se kredia e akorduar për këtë qëllim konsiderohet praktikisht me rrezik 0, si rrjedhojë e garantimit nga sovrani.

Procesi i riskedulimit të kësteve të kredive për të akomoduar sa më tepër kërkesa të ardhura nga ata klientë, gjendja financiare e të cilëve është ndikuar negativisht nga kjo situatë, në mënyrë që të lehtësohet barra e tyre financiare e momentit ishte në fokus të videokonferencës me kreun e qeverisë.

Në kuadër të masave të marra nga qeveria është trajtuar edhe hapja e llogarive të reja bankare për të gjitha ato palë që do të përfitojnë nga paketa sociale e vënë në dispozicion nga qeveria dhe që aktualisht nuk janë të pajisur me një llogari. Për të lehtësuar këtë proces, u diskutua hapja e këtyre llogarive në një kohë sa më të shkurtër dhe pa kosto të panevojshme. Për të shfrytëzuar në maksimum oraret e lejuara të lëvizjes së popullsisë, u trajtua edhe opsioni i lehtësimit të lëvizjes së punonjësve të bankave përtej orarit të lejuar.

Këtë të mërkurë edhe Këshilli Mbikëqyrës i Bankës së Shqipërisë është mbledhur për të diskutuar stabilitetin financiar të vendit.

Në deklaratën e bërë, Këshilli i Bankës Qendrore njofton se qëndrueshmëria e sistemit bankar do të ruhet, pavarësisht sfidës së paprecedentë që po përballet ekonomia nga pandemia e Covid-19.

Banka e Shqipërisë shprehet se në bashkëpunim me bankat në vend dhe autoritetet shtetërore do të përdorë të gjithë instrumentet për të ruajtur stabilitetin financiar të vendit.

Tv Klan

Të ngjashme

Grupi

Kallezo