Partia Demokratike ka vijuar dhe sot akuzat në lidhje me një tender 1.2 milionë dollarësh që sipas saj një drejtor i Ministrisë së Mjedisit e ka tenderuar për babain e tij, administrator të firmës Alb – Garden.
Sipas selisë blu, që nuk e bën publik emrin e drejtorit që vë nën akuzë, Kryeministri Rama dhe kreu i Kuvendit Ilir Meta po e mbulojnë korrupsionin skandaloz me sulme qesharake ndaj opozitës.
Ndaj kësaj akuze reagoi sot Ministria e Mjedisit, duke sqaruar se firma Alb – Garden nuk ka fituar asnjë nga tenderat e organizuar nga Ministria e Mjedisit si autoritet kontraktor.
Demokratët e akuzuan Kryeministrin edhe për një tjetër çështje.
Sipas tyre, ai po përjashton nga e Drejta Kushtetuese për Arsimin e Lartë 40 % të studentëve.
Partia Demokratike thotë se rritja e tarifave financiare është një tjetër akt armiqësor ndaj studentëve dhe favorizim i klientelës private.
Ky vendim i Ramës sipas saj, është në dëm të interesave të mijëra studentëve e familjeve të tyre.
Tv Klan