Naftëtarët: Bisedimet të bëhen paralel me grevën
Kryeministri Edi Rama ka përsëritur edhe një herë gatishmërinë e tij për t’u ulur në bisedime me grevistet naftëtare të Ballshit, por më parë u ka kërkuar atyre që të dalin nga greva e urisë. Nëpërmjet disa mesazheve në rrjetet sociale, kreu i qeverisë ka theksuar se është e pamundur që bisedimet të bëhen me presione e ultimatum.
“Ne po punojmë për të gjetur investitorë seriozë që të rindezin rafinerinë edhe pse greva juaj nuk ndihmon as për këtë! Ndërsa për ndihmën e mundshme shtetërore ndërkohë, meqë ju s’pranoni as të dilni në asistencë, ka vetëm një rrugë: Mbyllni grevën dhe ulemi qajmë hallin”.
Grevistet nga ana e tyre kanë mirëpritur ftesën e Kryeministrit për bisedime, por kanë kërkuar që ato të zhvillohen paralelisht me grevën.
Po pas këtij qëndrimi reagoi sërish Kryeministri, i cili shprehu keqardhje për refuzimin nga ana e grevisteve për të mbyllur grevën dhe për t’u ulur në tryezën e bisedimeve.
“Qeveria nuk negocion nën presionin e askujt dhe nuk pranon ultimatume nga askush. Mbyllni grevën dhe do të vij unë tek ju, menjëherë! Ndryshe s’ka bisedime”.
Naftetaret bënë të ditur se greva do të vazhdojë deri sa të merren të gjitha lekët e prapambetura që kompania u ka.
Tv Klan
