Rama nuk kursen as nëpunësit e shtetit: Do t’ju mbahet rroga 3 muaj nëse shkelni rregullat e reja

Rama nuk kursen as nëpunësit e shtetit: Do t’ju mbahet rroga 3 muaj nëse shkelni rregullat e reja

15:53 18/03/2020

Në kuadër të masave të reja të qeverisë që ka kufizuar së tepërmi lëvizjen e këmbësorëve duke filluar nga dita e nesërme, penaliteteve nuk u kanë shpëtuar as punonjësit e administratës shtetërore.

Kryeministri Edi Rama thotë se të gjithë punonjësit e Ministrive, Bashkive dhe institucioneve të tjera nga nesër ndalohen të përdorin makinat. Në të kundërt, do t’u mbahet rroga për 3 muaj dhe mund të pushohen nga puna.

“Nga nesër, të gjithë punonjësit e Ministrive, Bashkive e Prefekturave, nga Sekretarët e Përgjithshëm dhe deri tek i fundit, nuk do të përdorin më makinë për të shkuar në zyrë! Nga ky rregull përjashtohen vetëm punonjësit e Ministrisë së Shëndetësisë, Ministrisë së Mbrojtjes, Ministrisë së Financave apo të Prefektura e Bashkive, që janë të përfshirë në listën prioritare me firmën e titullarit, për të garantuar zhvillimin e luftës sipas planit, në aspektin shëndetësor dhe humanitar! Nga nesër, të gjithë punonjësit e institucioneve të varësisë së administratës qëndrore apo vendore, që e kanë punën në zyrë, nuk do të përdorin makinë për të shkuar në punë. Titullarët e të gjitha institucioneve të varësisë, duhet të çojnë sot tek ministri apo kryetari i bashkisë, listën e arsyetuar të punonjësve që e kanë të domosdoshme lëvizjen me makinë. Emër për emër. Shkelja e këtyre masave, të cilat do të përfshihen nesër, së bashku me masat e reja për lëvizjen e këmbësorëve në aktin normativ, do të ndëshkohet me mbajtjen e rrogës për 3 (tre) muaj dhe në rast përsëritje me largimin përfundimtar nga puna! Sot punonjësi i shtetit që shkel rregullat e luftës në mënyrë të përsëritur, nuk është një kundravajtës si të tjerët, po një dezertor në kuptimin e plotë të fjalës”.

Shefi i qeverisë thotë se e njëjta masë do të aplikohet edhe për këmbësorët që dalin në rrugë jashtë orarit të përcaktuar.

“Nga nesër, këmbësorëve që do të shkelin masat e reja të lëvizjes dhe që figurojnë në borderotë e republikës së republikës së shqipërisë, si punonjës të administratës qendrore apo vendore, do t’u mbahet rroga për 3 (tre) muaj dhe në rast përsëritjeje do të largohen përfundimisht nga radhët! Populli nuk i paguan taksat për t’u dhënë rroga atyre që rrezikojnë jetën e tij në këtë luftë ku punonjësit e shtetit duhet të jenë shembulli më kuptimplotë i disiplinës shtetërore dhe përgjegjshmërisë qytetare! Kjo luftë nuk është lojë! përballë armikut që na ka sulmuar jemi një vend, një popull dhe një shtet! vetëm kështu mund t’ia dalim dhe askënd që s’do të kuptojë nuk mund ta tolerojmë më”. /tvklan.al

Të ngjashme

Grupi

Kallezo