“Nuk e dija që kontrata me Pfizer nuk duhej bërë publike, nuk ka vend për dyshime”

Në fillim të vitit, kryeministri Edi Rama deklaroi se javën e tretë të Janarit do të mbërrinin dozat e tjera të vaksinës nga kompania Pfizer. Mirëpo gjatë një konference këtë të martë, kryeministri ka konfirmuar se do të shtyhet ardhja e dozave edhe me një javë. Kjo për shkak të shtyrjes së procesit të dorëzimit të dozave nga vetë kompania, vendim ky që sipas Ramës ka ndezur polemika në shumë shtete.  

“O Zot. Po të kishin mbërritur do ta kishe marrë vesh. Ti ke hall mos kanë ardhur fshehtas edhe këto. Përfaqëson edhe një media që e ka shtrirjen më të gjerë se kufijtë e Shqipërisë. Pfizer ka bërë një deklaratë që ka ndezur zjarr dhe polemika me shumë shtete duke thënë që do ta shtyjë për një javë procesin e dorëzimit të dozave që ka kontraktuar. Si t’ja bëjmë tani?”, u shpreh Rama.

Edi Rama deklaroi se kontrata me kompaninë Pfizer për të siguruar vaksinat antiCovid është e mbrojtur nga sekreti tregtar dhe nuk do të bëhet publike.

“Kontrata me Pfizerin është e mbrojtur në të gjithë botën nga sekreti tregtar, nuk bëhet publike përtej dëshirës sime”, tha Rama.

Rama tha se pati dëshirë që ta bëjë publike kontratën, por aty është vendosur klauzola e sekretit tregtar. Sipas kreut të qeverisë asnjë vend i BE-së nuk e ka bërë publike kontratën me Pfizer.  

“Ishte dëshira ime që ta bëj publike, s’ka asnjë gjë sa më takon për të fshehur, por kontratat janë kontrata dhe klauzola e sekretit tregtar është aty. Nëse gjeni një vend të BE-së apo cilido tjetër që do e bëjë publike ne do jemi të dytët që do e bëjmë”, tha Rama.

Kreu i qeverisë tha se çmimi i vaksinës është fiks, por sekreti tregtar ka të bëjë me modalitete të ndryshme të kontratës si për shembull sasitë që do të shpërndahen, koha etj.  

“Ju mund të dyshoni për çfarë keni dëshirë është e drejta juaj, por dyshimet mund t’i lehtësoni duke parë praktikat e të gjithave dhe sekreti që mbulon kontrata e Pfizer nuk lidhet me çmimin, çmimi është fiks, por lidhet me modalitetet e çdo kontrate dhe sipas negociatave ka modalitete të ndryshme, për sasitë, kohën e kështu me radhë. Paratë që paguhen për Pfizer nuk janë sekret”, tha Rama.

Ai shtoi ndër të tjera se nuk ka asnjë vend për dyshim. Kreu i qeverisë theksoi se ishte përgatitur për ta bërë publike në parlament kontratën, por u ndalua pikërisht prej sekretit tregtar.

“U mbush me konsipracione ky vend dhe kjo botë me lloj-lloj marrëzish. Pfizer ka një kontratë me të gjithë vendet dhe asnjë kontratë e Pfizer në asnjë vend nuk është publike. Unë këtë gjë nuk e dija. Thashë që do të shkojmë në parlament dhe do ta bëjmë publike dhe më thanë që nuk do e bësh publike se ruhet nga sekreti tatimor. Çfarë ka për dyshime këtu?”, tha Rama.

/tvklan.al