Ambasadori i Gjermanisë, Peter Zingraf është takuar këtë të mërkurë me Vitore Tushën, e cila është drejtuesja e Këshillit të Emërimeve në Drejtësi si dhe është anëtare e Gjykatës Kushtetuese.
Mësohet se në takim, Zingraf ka shprehur mbështetjen dhe angazhimin e Gjermanisë për reformën e sistemit të drejtësisë në Shqipëri dhe për ecurinë pozitive të saj me qëllim funksionimin sa më të shpejtë të institucioneve dhe plotësimin e kushteve për integrimin e Shqipërisë në BE.
“Një Gjykatë Kushtetuese funksionale është e një rëndësie qendrore për demokracinë dhe besimin e shqiptareve dhe shqiptarëve në institucionet e tyre”, është shprehur Zingraf.
Ndërkohë Vitore Tusha ka evidentuar rëndësinë që ka ngritja sa më parë e Gjykatës Kushtetuese. Si kryetare e KED-së, ajo ka treguar veprimtarinë e institucionet që drejton në ecurinë e procesit të përzgjedhjes dhe renditjes së kandidatëve për plotësimin e vakancave në Gjykatën Kushtetuese.
“KED-ja luan një rol të rëndësishëm në plotësimin e pozicioneve vakante në Gjykatën Kushtetuese dhe Gjykatën e Lartë. Unë jam mirënjohës për shpjegimet e zonjës Tusha në lidhje me punën e KED-së përgjatë verës, që prej marrjes së funksionit të saj si dhe për hapat e mëtejshëm”, thotë më tej ambasadori gjerman./tvklan.al
