Një person me rrezikshmëri të lartë shoqërore është vënë në pranga nga policia e Kukësit, në bashkëpunim me forcat RENEA. Sipas informacioneve në pranga ka rënë Burim Duraku, 31 vjeç, banues në fshatin Morinë të Kukësit.
Duraku ishte person i shpallur në kërkim, pasi Gjykata e Rrethit Gjyqësor Kukës ka vendosur masën e sigurisë “Arrest në burg” për veprat penale “Vrasja me dashje”, “Armëmbajtja pa leje”, “Vjedhja me dhunë” dhe “Kalimi i paligjshëm i kufirit, në bashkëpunim”.
Gjatë operacionit, forcat RENEA kanë ushtruar kontroll në banesën e tij, ku kanë gjetur dhe sekuestruar në cilësinë e provës materiale 1 armë zjarri pistoletë, 1 armë gjahu, 2 palë dylbi dhe fishekë luftarakë.
Më datë 26.03.2010, në vendin e quajtur Argostoli te Kefalinias në Greqi, dyshohet se Burim Duraku, në bashkëpunim me Sh. D., të maskuar kanë hyrë tek banesa e një shtetaseje greke, ndaj të cilës kanë ushtruar dhunë fizike dhe psikologjike, si dhe i kanë marrë një sasi monedhash.
Më datë 06.04.2010, në vendin e quajtur Trapezaki Livathi te Kefalinias, dyshohet se Burim Duraku, në bashkëpunim me Sh. D. kanë thyer derën e banesës së një shtetasi grek, ku kanë marrë sende me vlerë.
Më datë 16.04.2010 në vendin e quajtur Argostoli te Kefalinias, se këta dy persona kanë hyrë në banesën e një shtetaseje greke, të cilën e kanë lidhur dhe kërcënuar me thikë dhe pasi i kanë marrë një sasi lekësh, janë larguar duke e lënë me gojë të mbyllur.
Më datë 01.05.2010, në vendin e quajtur Argostoli te Kefalinias të Greqisë, Burim Duraku, në bashkëpunim me Sh. D., të maskuar janë futur në banesën private të shtetases greke A. V. Pasi kanë tentuar pa sukses të shpërthenin me një mjet të mprehtë derën midis kuzhinës dhe sallonit, e cila ka qenë e kyçur, e kanë thyer derën dhe janë futur brenda. Aty kanë gjetur shtetasen greke A. V., të cilës i kanë lidhur duart dhe këmbët me një shirit vetëngjitës. Më pas kanë grisur me thikën një copë xhakete dhe e kanë mbështjellë me shiritin vetëngjitës duke i zënë frymën e më pas i kanë vënë në kokë një qese plastike dhe si pasojë e asfiksisë ajo ka gjetur vdekjen. Këta dy shtetas më pas i kanë vjedhur një shumë të hollash dhe disa sende të çmuara.
Po ashtu ka rezultuar se këta dy persona kanë hyrë në Greqi në mënyrë të paligjshme, pa respektuar formalitetet ligjore të kalimit kufitar nëpërmjet ndonjë pikë kufitare të atij shteti.
Ministria e Drejtësisë së Republikës së Shqipërisë ka pranuar kërkesën e autoriteteve të drejtësisë së Greqisë, mbi transferimin e procedimit penal në ngarkim të Burim Durakut dhe Sh. D., të cilët dyshohen se kanë kryer veprat penale “Vrasja me dashje, në bashkëpunim”, “Vjedhja me dhune”, “Mbajtja pa leje e armëve të ftohta”dhe “Kalim i paligjshëm i kufirit shtetëror”.
Materialet i kaluan Prokurorisë pranë Gjykatës së Shkallës së Parë Kukës, për veprime të mëtejshme./tvklan.al
