Autoritetet e sigurisë në Maqedoninë e Veriut thonë se MPB-ja që para dy muajve ka pasur njohuri për organizimin e arratisjes nga Burgu i Idrizovës. Në këtë procss është punuar bashkë me Agjencinë për Siguri Kombëtare dhe është ngritur shkalla e sigurisë nëpër burgje.
Ministri i Brendshëm, Oliver Spasovski, ka theksuar se po ndërmerren masa të zgjeruara hetimore për të zbardhur rastin e parandalimit të arratisjes nga Burgu i Idrizovës, përmes një tuneli të gërmuar nga të burgosurit.
“Po ndërmerren masa gjithëpërfshirëse, jo vetëm tani, por procesi ka nis që më herët. Po punohet në grumbullimin e dëshmive, në bashkëpunim me prokurorin për krim të organizuar ku padyshim duhet të dëshmohet edhe pjesëmarrja e punonjësve të burgut”.
Njoftimet thonë se së paku tetë të dënuar me burg të rëndë, me muaj kanë gërmuar tunelin për t`u arratisur nga Burgu i Idrizovës.
Sipas detajeve të bërë publike nga policia, tuneli ka qenë i gjatë rreth 40 metra, me diametër 80 centimetra. Autoritetet e sigurisë janë duke hetuar nëse në këtë aksion janë të involvuar edhe punonjës të burgut.
Sipas të dhënave të Drejtorisë për Ekzekutimin e Sanksioneve, gjatë vitit të kaluar, 250 të burgosur janë arratisur nga burgjet. Pjesa më e madhe e tyre kanë shfrytëzuar fundjavë të lirë dhe nuk janë kthyer për të vuajtur dënimin.
Maqedonia e Veriut është rekordere për arratisje nga burgu, me thuajse 700 arratisje në 10.000 të burgosur, thuhet në Raportin Vjetor të Këshillit të Evropës për të burgosurit.
Klan Macedonia
