Reshjet e shiut kanë provokuar sërish rrëshqitje gurësh dhe inertesh në aksin Elbasan-Librazhd. Në vendin e quajtur, “Kthesat e Murrashit”, gurë dhe shkëmbinj kanë rrëshqitur nga malet duke bllokuar njërën anë të rrugës.

Për pasojë është vështirësuar qarkullimi i automjeteve. Në vendngjarje kanë shkuar mjete të firmës së pastrimit që po punojnë për zhbllokimin e rrugës. Gjithashtu edhe punonjës të policisë rrugore po normalizojnë trafikun.

Mësohet se për shkak të bllokimit, radha e automjeteve ka qenë e gjatë në të dy kahet e rrugës Elbasan-Librazhd.

Kujtojmë se në “Kthesat e Murrashit” kanë ndodhur një sërë aksidentesh me vdekje si pasojë e rrugës së vështirë.

Së fundmi ka një projekt të Drejtorisë së Përgjithshme të Rrugëve, por që do ende kohë që të normalizojë situatën duke ndërhyrë në shpatet e maleve.

Klan News