Rudina – Emisioni 04 shtator 2019

Rudina – Emisioni 04 shtator 2019

18:30 04/09/2019

Artenisa Ozaj -ShowGirl/ Sipërmarrëse
Greiss Petroviq -Drejtuese “Grace Model Management”
Alesio Aliaj – Model/Organizator eventesh

Pushimet verore janë momenti më kulminant i vitit. Pas një periudhe të gjatë pune, çlodhja është mëse e nevojshme. Të gjithë zgjedhin vendet e preferuara dhe bëhen gati për disa ditë relaksi. Por pak më ndryshe i përjetojnë pushimet çiftet që kanë fëmijë me vete. Shpesh lind pyetja nëse janë vërtetë pushime, pushimet me fëmijët? Për prindërit e rinj pushimet e para me një bebe janë vërtetë një situatë frike për fëmijën dhe me dyshimin se mos ndoshta nuk përballojnë dot udhëtimin.

Kur fëmijët janë më të rritur problematikat ndryshojnë, por sërish janë prezente. Vëmendja e përqendruar tek fëmijët e bën pak të lodhshëm pushimin për prindërit, ndaj edhe pas pushimeve shpesh shprehen se në të vërtetë nuk kanë bërë pushime. Për të diskutuar lidhur me këtë temë ishin të ftuar në emisionin “Rudina” në Tv Klan, Artenisa Ozaj, sipërmarrëse, Greiss Petroviq, drejtuese e “Grace Model Management” dhe Alesio Aliaj, model dhe organizator eventesh.

“Mund të them që është një mision dhe jo pushime për prindërit, janë pushime për fëmijët. Prindërit mësojnë shumë kur janë me fëmijët, por vetë nuk pushojnë. Ndryshe nga vjet, kur Emel ishte 2 muajshe, këtë vit ishte shumë i bukur. Por nuk mund të them se janë 100% pushime”, tha Petroviq.

“Ne ishim në Turqi këtë vit për një javë. Këtë vit ne i shijuam pushimet ashtu si edhe Abi, pasi këtë vit është më e rritur. Çuditërisht edhe vajza i ka shijuar pushimet këtë vit”, tha Aliaj.

“Ne i bëmë pushimet në Qerret. Erdhëm nga Australia dhe udhëtimi zgjati shumë dhe për fëmijët ishte i tmerrshëm. Vajza kishte problem me veshët nga zhurma e avionit dhe djali është shumë i vogël. Ky është muaji i parë për mua që kam qëndruar gjatë pushimeve çdo ditë me familjen”, tha Ozaj.

Ndërkohë lidhur me këtë temë, doktor Edi Tushe tha se për fëmijët është e rëndësishme t’i kalojnë pushimet me prindërit, pasi ndarja me ta mund t’u shkaktojë stres dhe trauma. Sipas tij, për të mos ndjerë bezdi nga fëmijët, prindërit duhet të zgjedhin vendin e përshtatshëm për të pushuar bashkë me ta.

“Pushimet me fëmijët nuk janë pengesë për prindërit. Shpeshherë në varësi edhe të moshës largimi nga shtëpia dhe lënia e tyre me gjyshërit mund ta stresojë shumë fëmijën dhe t’i shkaktojë një lloj traume dhe mund t’i duhet kohë për ta marrë veten. Mesazhi im është që fëmijët nuk janë pengesë për pushimet e prindërve, thjeshtë duhet planifikuar mirë vendi që të mos kthehet në bezdi”, tha Edi Tushe.

Sazan Guri Ambientalist

Meri Shehu – Astrologe

Shtatori është muaji që shënon edhe fillimin e një sezoni të ri pas pushimeve, si në punë, në shkollë, etj. Ndaj edhe sot në emisionin “Rudina” në Televizionin Klan, si çdo fillim muaji do të njihemi me parashikimin e yjeve për secilën shenjë të horoskopit. Për të na treguar më shumë rreth parashikimit të yjeve ishte e ftuar në studio astrologia Meri Shehu.

Në mënyrë të përgjithshme, Shehu tha se muaji Shtator do të jetë realist, krijues dhe i këndshëm. “Këtë muaj do të dominojnë shenjat e tokës”, tha astrologia.

Renditja e shenjave të horoskopit nga ajo me më pak fat tek me e favorizuara:

12. Gaforrja Janë në këtë pozicion për faktin se kemi disa kundërshtime. Gjërat që gaforret do të rregullojnë në fillim të muajit do të vihen në provë në fund të muajit dhe ata do të kuptojnë gabimet dhe nuk do të jenë shumë komodë. Çështjet ligjore dhe puna do të jenë pak të vështirësuara. Mund të përmbyset një projekt shumë i rëndësishëm.

11. Dashi Nëse nuk do të jenë metodikë dhe të kenë arritur diçka me realizëm nuk do mund të arrijnë në një majë që pretendohet. Do të kenë zhgënjime. Do të kenë çështje ligjore pengesë. Dashuria është drejt konkretizimeve.

 10. Peshqit Janë në këtë pozicion sepse sado përkrahje dhe bashkëpunime të kenë në fillim të muajit, ekziston lidhja Neptun-Jupiter që nuk jep mbështetjen e duhur. Do të kenë plane, qëllime dhe konkretizime deri diku. Mund të kenë zhgënjime në dashuri.

9. Bricjapi Kanë një energji të mirë për muajin Shtator. Do të udhëtojnë, do të dashurojnë dhe do të vendosin për një marrëdhënie konkrete. Në fund të muajit do të ndodhin disa ndryshime, që do t’i detyrojnë të shohin edhe një herë pas. Do të kenë plane familjare dhe do të forcohen marrëdhëniet në çift.

 8. Demi Do të kenë përfitime këtë muaj. Nëse kanë një partneritet mund të jenë të suksesshëm gjatë Shtatorit dhe mund të fitojnë para. Duhet të kenë kujdes me çështjet ligjore dhe me partneritetet. Dashuria do të jetë e qëndrueshme për ta.

7. Binjakët Do të aludohet për karrierën dhe jetën e tyre. Mund të kemi një ngritje shumë të madhe në detyrë, por kjo mund të rrëzohet shumë shpejt brenda muajit. Edhe në jetën personale mund të shkojë pak a shumë e njëjta gjë. Mund të mendojnë se kanë gjetur njeriun e duhur dhe në fund të muajit mund të thonë se nuk ekziston.

6. Virgjëresha Nëse virgjëresha këtë muaj ka një bashkëpunim me demin apo bricjapin mund të arrijnë një kombinim të fuqishëm për bashkëpunime të rëndësishme. Virgjëresha është në kulmin e energjisë. Në 15 ditëshin e parë shumë gjëra mund të ndryshojnë për mirë.

5. Peshorja Pas 15 ditëshit të parë të muajit Shtator do të marrin stafetën. Do të kenë rendiment, do t’i japin më shumë rëndësi marrëdhënies me të tjerët, etikës dhe do të bëhen më njerëzor. Në dashuri do të ndodhin ndryshime shumë të rëndësishme dhe paratë do të kenë ngritje.

4. Akrepi Do të kenë ndikim pozitiv nga Bricjapi dhe Virgjëresha. Do të kenë rendiment në punë dhe do të ngrihen në karrierë. Do të jenë pak të fshehtë këtë muaj dhe do të shijojnë jetën e tyre personale.

3. Ujori Do të jenë mendja dhe pjekuria e kësaj periudhe. Do të bëjnë punë të rëndësishme. Paraja nuk do të jetë shumë mirë për ta.

2. Shigjetari Ana ekonomike e shigjetarëve do të shkëlqejë këtë muaj. Do t’u jepet mundësia të rregullojnë stabilitetin ekonomik dhe karrierën. Do të mund të bëjnë të mira edhe për veten, edhe për të tjerët. Nuk është moment për dashuri për ta, por për para dhe karrierë.

1. Luani Dielli rrezaton akoma në shenjën e tyre, edhe pse jemi në shenjën e Virgjëreshës. Virgjëresha do ta ngrejë shumë Luanin në çështjet ekonomike këtë muaj dhe paratë i duhen shumë Luanit, sepse shpenzon.

Të ngjashme
UKT