RUDINA – EMISIONI 17 QERSHOR 2019! – TV KLAN

RUDINA – EMISIONI 17 QERSHOR 2019!

Emision: 17.06.2019

Të ftuar:

Sabiani Medini – Këngëtar
Keisi Medini – Këngëtare


Ai është tashmë një këngëtar i njohur që prej 19 vitesh ka ditur të bëj për vete publikun me këngët e tij që janë kthyer në hite. Bëhet fjalë për këngëtarin Sabian Medini, në hapat e të cilit është edhe vajza e tij Kejsi. Pasionin për artin ajo e ka trashëguar nga babi. Modelja e njohur po ndjek muzikën edhe pse ka shumë përzemër modelimin. Lidhja e tyre babë e bijë është shumë e veçantë, aq sa i kemi parë të kenë të njëjtin stil edhe në look. Dashuria për muzikën e ka forcuar edhe më shumë marrëdhënien e tyre dhe i ka bërë të pandashëm me njëri-tjetrin. Sot babë e bijë ishin të ftuar në emisionin “Rudina” në Tv Klan për të treguar më shumë rreth marrëdhënies së tyre.

“Unë s’do doja të ndryshonte asgjë tek babai im, më pëlqen këtu siç është. Ne jemi shumë të sinqertë me njëri-tjetrin, çdo gjë e diskutojmë një herë bashkë dhe më pas vendosim. Jemi shumë të lidhur, ai është shoku im i ngushtë. Më shumë bëhem unë xheloze për të se sa ai për mua. Por gjëja e parë që më thotë çdo ditë është që të lexoj. Për sa i përket muzikës nuk është e thjeshtë të hysh në treg, por emri i babait më ka ndihmuar shumë. Kur unë nisa të këndoj babit i dukej e çuditshme, habitej. Unë e dashuroj muzikën dhe dua të fokusohem më shumë”, tha Kejsi.

“Kejsi është vajzë që ka ambicie dhe nuk e kam menduar asnjëherë dhe nuk ka qenë ambicia ime që të bëhej këngëtare. Tani Kejsi ka mbështetjen time totale për muzikën. Kejsi është vajzë e mirë, por me inat të fortë. Në publik ngjan si engjëll, por kur nevrikoset është e çuditshme, shndërrohet. Kejsi ka zë të përsosur, unë nuk e kam sforcuar sepse nuk dua që të fokusohet vetëm aty. I kam bërë një studio të vetën në mënyrë që të jetë e pavarur. Kur Kejsi ishte e vogël dhe i bërtisja ndonjëherë, më pas i thosha: “Ti duhet të më falësh mua se nuk kam eksperiencë si baba, ti je fëmija im i parë”. Ndoshta më ka kuptuar, ndoshta jo, por sado që të kujdesemi ne, lutjet para Zotit janë më të mëdha: “Zot na ruaj fëmijët dhe mbaji në rrugë të mbarë”. Unë jam munduar ta shkolloj mirë Kejsin dhe e këshilloj të lexojë. Kur jam bërë baba kam qenë shumë i vogël, kisha emocione dhe më dukej e çuditshme. Kur shkova në maternitet pashë fëmijët, iu afrova një fëmije që ishte shumë i bukur, më pas pashë një tjetër që i kishte ikur koka shtrembër sepse kishte lindur e madhe, ishte Kejsi. Erdhi mamija dhe më tha: “Kjo këtu është vajza jote”. “Booo” thash. E nxora nga maternitetit me një batanije të bukur, të cilën e kemi ruajtur dhe e kemi edhe sot. Më pas u fokusova tek karriera ime dhe koha kaloi. Tani jetojmë bashkë të dy. Kur ishte e vogël ka qenë si kukull e vogël dhe donte shumë ngjyrën blu”, tha Sabiani.

Dardane Hadri – Piktore


Ajo është një piktore e talentuar që nuk pikturon vetëm në telajo, por edhe në qelq. Dardane Hadri ka një lidhje shumë të veçantë me natyrën dhe me peizazhin kryesisht, ndaj ka vendosur t’i quajë të gjitha punimet e saj “Kujtime të peizazhit”.

Që prej vitit 1995 ajo jeton në Londër, ku ka mbaruar edhe studimet për mësimdhënie dhe aktualisht është mësuese arti atje. Sot ishte e ftuar në emisionin “Rudina” në Tv Klan nga ku tregoi më shumë për dashurinë e madhe që ka për artin.

“Unë kam pasur fatin që fëmijërinë ta kaloj në Pejën e bukur. Babai im, Ali Hadri më ka dhuruar dashurinë për arsimin. Ndërsa nëna ishte talent i posaçëm dhe dashurinë për artin e kam prej saj. Pikturat në gota qelqi fillimisht i kam punuar për miqtë e mi si dhurata, por vitet e fundit kam shumë porosi dhe vendosa ta provoj këtë teknikë. Është kënaqësi e posaçme sepse mënyra se si aplikohen ngjyrat është shumë delikate dhe kur reflektohen në dritën e diellit krijojnë një iluzion dyjzimi ngjyrash. Mundohem që në fragmente të pikturave të mia të prezantoj peizazhin e Grykës së Rrugovës. Në varësi të pijeve që hedhim në gotë ndryshojnë edhe ngjyrat e pikturës”, tha Dardane Hadri.

Puna e piktores nga Kosova është vlerësuar edhe nga familja mbretërore në Londër, madje Princi Charles e kishte ftuar atë zyrtarisht pasi kishte parë projektet e saj.

“Kisha ftesë zyrtare prej Princit për shkak se bashkëpunoj ngushtë me akademinë “Royal Academy Award” dhe me galeri prestigjioze. Kam punuar në një projekt, punë të cilat janë ekspozuar në një rrugë shumë të frekuentuar në Londër dhe më ftuan. Ishte emocion shumë i veçantë sepse mu vlerësua puna. Princi ishte shumë i mirë, unë mendova se do të ishte formal, por ai ishte shumë i shoqërueshëm. Kemi biseduar për 15 minuta dhe më ka lënë përshtypje të mira. Është vlerësimi i punës time dhe për këtë ndihem shumë mirë”, tha piktorja.

Kategori
Rudina
0 Komente

Përgjigju

*

*