Ajo që u arrit në bisedimet e para të këtij muaji pas më shumë se tre vitesh mes palës ruse dhe ukrainase në Stamboll tashmë po konretizohet.
Rusia dhe Ukraina filluan një shkëmbim të madh të burgosurish dhe pritet që ky proces të zgjasë për disa ditë. Shkëmbimi i të burgosurve ishte i vetmi hap konkret drejt paqes që të dyja palët ranë dakord në bisedimet e tyre në Stamboll.
Vetë Presidenti amerikan Donald Trump përgëzoi të dyja vendet në këtë postim në rrjetet sociale teksa shtron pyetjen: “Kjo mund të çojë në diçka të madhe???”
“Një shkëmbim i madh të burgosurish sapo përfundoi midis Rusisë dhe Ukrainës. Do të hyjë në fuqi së shpejti. Urime të dyja palëve për këtë negociatë. Kjo mund të çojë në diçka të madhe???”, shkroi Presidenti amerikan në një postim në rrjetin social Truth.
Nga takimi i 16 Majit në Stamboll nuk pati një marrëveshje për armëpushim të propzuar nga Trump por palët ranë dakord për të vijuar dialogun mes tyre. Për raundin e radhës së bisedimeve është menduar Vatikani dhe vetë kreu i Selisë së Shenjtë, Papa Leoni i XIV, është shprehur i gatshëm për të pritur të dyja delegacionet.
Megjithatë, ministri i Jashtëm rus Sergei Lavrov ka deklaruar se Moska nuk ka gjasa të pranojë një propozim të tillë.
“Do të ishte paksa e pahijshme që vendet të diskutonin çështje që lidhen me eliminimin e shkaqeve rrënjësore të luftës në tokë katolike. Nuk do të ishte shumë e mirë për vetë Vatikanin të priste delegacione nga vendet ortodokse në këto rrethana”, ka deklaruar Lavrov.
Pavarsisht kritikave, Lavrov theksoi se Rusia nuk përjashton kontaktet me Zelenskyn dhe qeverinë e tij për një marrëveshje mbi parimet e zgjidhjes së konfliktit.
Klan News
