Rusia shantazh bërthamor me centralin Zaporizhzhia


Rusia shantazh bërthamor me centralin Zaporizhzhia

23:59 06/10/2022

Shtohen kritikat ndaj ushtrisë ruse dhe ministrit të Mbrojtjes Sergei Shoigu

Presidenti ukrainas VolodymyrZelenskiy akuzoi Rusinë për “shantazh bërthamor” lidhur me kapjen e centralit bërthamor Zaporizhzhia në Ukrainën jugore.

“Kapja e termocentralit tonë bërthamor në Zaporizhzhia i shërben Rusisë për të shantazhuar Europën, e mbi të gjitha Ukrainën”.

Para pushtimit rus, centrali i siguronte Ukrainës rreth një të pestën e energjisë elektrike. Moska dhe Kievi akuzojnë njëra-tjetrën për bombardimin e territorit të centralit, duke rrezikuar një katastrofë bërthamore.

Në Kombet e Bashkuara, Rusia po lobon për një votim të fshehtë në vend të një votimi të hapur javën e ardhshme, kur Asambleja e Përgjithshme prej 193 anëtarësh do të shqyrtojë rezolutën e bashkëhartuar nga Shqipëria dhe ShBA-ja për të dënuar të ashtuquajturin aneksim të katër rajoneve pjesërisht të pushtuara të Ukrainës.

“Tani duhet të fokusojmë përpjekjet tona të përbashkëta për ta bërë votimin në Asamblenë e Përgjithshme për këtë rezolutë sa më të qartë që të jetë e mundur”.

Çështja e centralit bërthamor po mban të alarmuar dhe Agjencinë Ndërkombëtare të Energjisë Atomike. Kreu i saj Rafael Grossi tha të enjten se e konsideronte termocentralin bërthamor të Zaporizhias si një strukturë ukrainase.

“Kjo është një çështje që lidhet me të drejtën ndërkombëtare… ne duam që kjo luftë të ndalet menjëherë, dhe natyrisht qëndrimi i IAEA është se ky objekt është një strukturë ukrainase”.

Një raketë ruse shkatërroi një bllok apartamentesh në qytetin e Zaporizhia që Moska thotë se e ka aneksuar, duke vrarë të paktën tre vetë.

Mijëra trupa ruse janë tërhequr pasi vija e frontit u shkatërrua. Kritikat publike ndaj zyrtarëve të lartë ushtarakë të Rusisë, dikur tabu, po shtohen gjithashtu pasi dy aleatë të presidentit Vladimir Putin kritikuan atë që ata thanë se ishte mënyra e paaftë për zhvillimin e luftës.

Pakënaqësia ka filluar të rritet edhe mes drejtuesve besnikë të televizionit shtetëror , të cilët po diskutojnë mungesën e rreth 1 milionë uniformave ushtarake dimërore. “Ju lutem më shpjegoni se cila është ideja gjeniale e shtabit të përgjithshëm tani?“, tha Vladimir  Solovyov, një nga drejtuesit më të shquar të televizionit rus.

Akuza për korrupsion po lëshohen në drejtim të ministrit të Mbrojtjes Sergei Shoigu.












Të ngjashme