Me titullin “Shqipëria e vogël dhe aspiruese pret samitin gjigant evropian”, agjencia prestigjioze e lajmeve “Reuters” ka pasqyruar mendimin e qytetarëve të kryeqytetit për këtë ngjarje të rëndësishme.
“Jemi shumë të lumtur që një takim i tillë po zhvillohet në vendin tonë. Kjo do të thotë që ngadalë, ngadalë, po arrijmë edhe ne nivelin e BE-së dhe po përmbushim kriteret e saj. Jam i lumtur që mund t’i bashkohemi rregullave dhe qytetërimit të BE-së”, tha Myrvete Zaimi.
Tirana pret 53 liderë nga i gjithë Komuniteti Politik Evropian dhe ky takim me siguri do të dominohet nga lufta në Ukrainë, por vendet e vogla të Ballkanit shpresojnë që diskutimi për zgjerimin e BE-së do të jetë gjithashtu pjesë e Samitit të Komunitetit Politik Evropian.
Agjencia e lajmeve “Reuters” shkruan se vendimet e kryeministrit Edi Rama për të pranuar emigrantë nga Italia, për të rritur prodhimin e burimeve të rinovueshme dhe për të hapur vendin ndaj investimeve të huaja përfshirë atë të dhëndrit të Presidentit të SHBA-së, Donald Trump, Jared Kushner kanë rritur shanset e Shqipërisë për t’u bashkuar me bllokun.
“U rrita si fëmijë në komunizëm në vitet ’80. Kur sheh sa larg ka shkuar Shqipëria dhe mbajtjen e një takimi të tillë me udhëheqësit e BE-së dhe Mbretërisë së Bashkuar, është kënaqësi ta shohësh këtë të ndodhë. Por kjo tregon gjithashtu se Shqipëria po ecën në drejtimin e duhur pavarësisht të gjitha problemeve me të cilat u përball”, tha Dritan Hoti.
“A mund ta imagjinoni, të kemi këtu kryeministrat e të gjithë Evropës? Është diçka e paimagjinueshme për Shqipërinë”, u shpreh Esat Çuçllari.
Ndër të tjera, në shkrim theksohet se autoritetet kanë marrë masa për fluksin e të premtes. Fluturimet nga aeroporti i Tiranës, i cili po i nënshtrohet një rikonstruksioni mes një bumi turistik në rritje, mund të ndërpriten, ndërsa janë mbyllur edhe disa akse rrugore.
Rrugët përreth qendrës së zhurmshme, ku samiti do të zhvillohet në një tendë të re gjigante për konferenca, gjithashtu do të jenë me akses të kufizuar.
Klan News
