21 Marsi, është Dita Botërore e Poezisë, 21 Marsi është edhe Dita e Novruzit. Por, që prej vitit 2007, 21 Marsi shënon edhe Ditën Botërore të Sindromës Down. 12 vite më pas, fëmijet me Sindromën Down në të gjithë botën, kanë ende shumë arsye për të mos festuar.

Ishte ky mesazhi që hapi organizimin e fondacionit Down Syndrome Albania pasditen e së enjtes në Sheshin Skënderbej.

“Në çështjet e arsimit ka zhvillime pozitive, ju keni dëgjuar për mësuesin ndihmës, por nuk janë të mjaftueshme kushtet për të dhënë arsimimin ideal për fëmijët me aftësi të kufizuar. Mësuesit ndihmës dhe i gjithë sistemi arsimor nuk është i mirëtrajnuar nën vizionin dhe konceptin e arsimit gjithëpërfshirës. Punësimi ka një ligj të mirë që i detyron bizneset të punësojnë persona me aftësi të kufizuar, por mungon hallka e rëndësishme e përgatitjes për tregun e punës të personave me aftësi të kufizuar”

, tha Emanuela Pepkola Zaimi, themeluese e Down Syndrome Albania.

“Eja për një përqafim”, bëri bashkë fëmijë e të rritur, për t’u dhuruar përqafime jo vetëm njerëzve me Sindromën Down, por kujtdo kishin pranë. Sepse të gjithë, meritojnë t’u dhurohet një përqafim.

“Janë përqafimet dhe fjalët e bukura ato që na bëjnë të ndihemi të lumtur në fund të ditës”

shtoi Zaimi.

Pak ditë më parë, themeluesja e Down Syndrome Albania, Emanuela Zajmi iu kundërpërgjigj publikisht Xhensila Myrtezajt, për faktin se në një koment në Instagram, këngëtarja përdori termin “mangesi” duke iu referuar Sindromës Down.

Në fakt, përmes komentit të saj, Xhensila Myrtezaj i kthente përgjigje një komentuesi, i cili aludonte se vajza e saj Ajka, kishte lindur me Sindromën Down.

Paçka se deklarata e saj u mediatizua për shkak se i drejtohej një personazhi të njohur për publikun, në Ditën Botërore të Sindromës Down, mesazhi i Emanuela Zajmit u drejtohet të gjithëve.

“Ka vend ende për të edukuar dhe për të informuar. Shpeshherë nuk janë fjalët e duhura ato që përdorin qoftë edhe të afërmit tanë, jo vetëm personat publikë. Ende nuk përdoren shprehjet e duhura kur flitet për Sindromën Dawn. Stigma është ende prezente në shoqëri. Kur ti pranon si individ apo si komunitet fillon dhe bën veprime që ndihmojnë në gjithëpërfshirjen e këtyre individëve në shoqëri.

Më 21 Mars, fëmijët e qendrës “Jonatan” dhuruan një shfaqje artistike plot ritëm dhe humor.

Në Ditën Botërore të Sindromës Down, qendra “Jonatan” vendosi të bënte bashkë fëmijët e qendrës me fëmijë të grupeve të ndryshme artistike, si mënyra më e mirë për të treguar se të gjithë, duhet të jenë të barabartë.

Dhe jo vetëm në skenë, por edhe në jetën e përditshme, mundësitë e barabarta janë strategjia më e mirë për t’i ndihmuar fëmijët me Sindromën Down të përfshihen dhe nga ana tjetër, edhe për ta shtyrë shoqërinë t’i pranojë ata mes të barabartëve.

Vit pas viti, sfida më e madhe e organizatave të dedikuara fëmijëve me Sindromën Down, mbetet e njëjta si për çdo organizatë humanitare: Barazia.

Me një kromozom shtesë ose jo, me lekurë të errët apo më pak të errët, gra apo burra, të gjithë në çdo cep të botës, meritojnë shanse të barabarta për të nxjerrë në pah aftësitë e veta.

/tvklan.al