Ekspertët kanë ngritur alarmin se pavarësisht vaksinimeve situata nga Covid-19 mund të bëhet kritike
Pavarësisht dritës jeshile që presidenti amerikan Joe Biden dha kur tha se 90% e popullësisë do të vaksinohet, ekspertët kanë ngritur alarmin se numri i infektimeve do të rritet edhe më shumë.
SHBA-ja ka regjistruar rreth 60,000 raste të reja çdo ditë, një shifër shumë herë më e lartë sesa dy muajt më parë. Aktualisht Amerika mban vendin e parë nga ku 31 milionë janë infektuar dhe mbi 563 mijë njerëz kanë humbur jetën.
Drejtoresha e agjencisë së shëndetit publik të SHBA-së, Qendrat për Kontrollin dhe Parandalimin e Sëmundjeve (CDC), Rochelle Walensky ka bërë të ditur se rastet ditore mund të kapin sërisht rekorde pavarësisht shpresës për t’u vaksinuar.
Walensky tha se nuk donte që SHBA të përballeshin me një rritje tjetër të rasteve dhe vdekjeve siç ka ndodhur në shumë vende evropiane. Rastet janë rritur veçanërisht në Michigan dhe në veri-lindje të vendit, duke përfshirë Connecticut dhe New York.
Duke folur në një fjalim televiziv nga Shtëpia e Bardhë, Presidenti Biden lëshoi një lutje drejtuar guvernatorëve të shtetit për të rivendosur ligjet që u kërkojnë qytetarëve të mbajnë maska me detyrim në vendet publike.
Repartet e terapive intensive vijojnë të tejmbushen me pacientë për shkak edhe të varianteve të reja të Covid-19 të përhapura në vend. Më shumë se një në pesë të rritur dhe pothuajse të gjithë amerikanët e moshës mbi 65 vjeç janë plotësisht të vaksinuar.
Klan News
