Nivel i lartë infektimesh në Amerikën Latine, Rusi e Gjermani
Shtetet e Bashkuara prekën një tjetër nivel të lartë infektimesh nga COVID-19. Numri i të vdekurve këtë të enjte tejkaloi 2 milionë, mes të cilëve janë shënuar mbi 115 mijë viktima.
Autoritetet shëndetësore amerikane thonë se ritmet e infektimeve po rriten sërish, teksa Nju Jorku që ka edhe nivelin më të lartë të përhapjes së koronavirusit, ka nisur heqjen e masave bllokuese, duke vënë në funksion edhe transportin publik. Ekspertët dyshojnë se shkak i shtimit të rasteve të infektimit është jo vetëm heqja graduale e masave bllokuese por edhe pjesëmarrja masive në protestat anti-racizëm.
Amerika Latine është një tjetër vatër aktive që po zgjerohet me ritme të frikshme. Numri i viktimave në vendet e kësaj hapësire ka arritur në mbi 70 mijë. Më problematike situata duket në Brazil që renditet i dyti në botë për numrin e të prekurve pas Shteteve të Bashkuara.
Përhapje e shpejtë shënohet edhe në Meksikë, ku vetëm në 24 orët e fundit janë regjistruar mbi 4800 të infektuar të rinj, një shifër rekord për këtë vend.
Afro 8800 raste të reja infektimesh janë regjistruar në Rusi, që e çojnë numrin e të prekurve në mbi 500 mijë që prej nisjes së pandemisë.
Rusia renditet e treta në shkallë globale për nga numri i të prekurve. Numri i infektimeve ditore në Gjermani shënoi 555 këtë të enjte, shifra më e lartë e ditëve të fundit, teksa tendenca e infektimeve është në rritje. Në gjithë botën numërohen mbi 7.4 milionë të prekur prej të cilëve 420 mijë kanë humbur jetën.
Tv Klan
