Një 42-vjeçar në Gjirokastër ka rënë në prangat e policisë pasi është konstatuar se shiste doza kokaine në zona të ndryshme të qytetit.
Sipas asaj që bëjnë të ditur uniformat blu është bërë i mundur edhe sekuestrimi i një sasie lënde narkotike dhe automjeti që përdorte i arrestuari. Bëhet e ditur se 42-vjeçari i arrestuar është banues në fshatin Goranxi, Dropull.
Nga hetimet ka rezultuar se ky shtetas, pasi siguronte lëndë narkotike, e ndante në doza, të cilat i shiste në zona të ndryshme të qytetit të Gjirokastrës.
Materialet procedurale i kaluan Prokurorisë, për veprime të mëtejshme.
“Kapet në flagrancë dhe vihet në pranga 1 shtetas që shiste doza kokaine, në zona të ndryshme të qytetit. Sekuestrohen një sasi lënde e dyshuar narkotike kokainë dhe automjeti që përdorte i arrestuari, për këtë veprimtari kriminale. Seksioni për Hetimin e Narkotikëve i DVP Gjirokastër, në vijim të punës për goditjen e veprimtarive kriminale në fushën e narkotikëve, ka siguruar informacion për një rast të shitjes së dozave të kokainës, në qytet. Për goditjen e këtij rasti, në bashkëpunim me Sektorin Operacional, u organizua dhe u finalizua operacioni policor i koduar “The remaining”, si rezultat i të cilit u arrestua në flagrancë shtetasi: V. R., 42 vjeç, banues në fshatin Goranxi, Dropull, për veprën penale “Prodhimi dhe shitja e narkotikëve”.
Gjatë operacionit, në aksin rrugor “Gjirokastër-Kakavijë”, në afërsi të fshatit Goranxi, shërbimet e Policisë kanë lokalizuar dhe ndaluar automjetin me drejtues shtetasin V. R. Gjatë kontrollit fizik, këtij shtetasi iu gjet një sasi lënde e dyshuar narkotike kokainë, që dyshohet se e posedonte me qëllim shitjen në doza. Nga hetimet ka rezultuar se ky shtetas, pasi siguronte lëndë narkotike, e ndante në doza, të cilat i shiste në zona të ndryshme të qytetit të Gjirokastrës. Materialet procedurale i kaluan Prokurorisë, për veprime të mëtejshme”, njofton Policia.
/tvklan.al
