Shkodra, qyteti që nuk zhgënjen asnjëherë


Shkodra, qyteti që nuk zhgënjen asnjëherë

15:54 02/08/2020

Larmi paketash turistike edhe në kohën e pandemisë

Ditët e nxehta lakmojnë detin, por kjo nuk e spraps Rozafën t’i ftojë vizitorët drejt bukurive natyrore e historike të qytetit mbi të cilin ngrihet.

Shkodra e biçikletave, humorit të hollë dhe stilit venecian pret çdo vit me qindra turistë.

4 kilometra nga qendra e qytetit, Legjenda e murosjes së Rozafës, gruas që mban në këmbe kalanë 2500 vjeçare, tërheq kureshtarë që prej mëngjesit.

Janë kryesisht shqiptarë që jetojnë jashtë vendit, por që turizmit patriotik i janë përgjigjur edhe në kohërat e vështira të pandemisë.

“Jetojmë në Boston, erdhëm që fëmijët të shikonin rrënjët dhe identitetin e gjakut të tyre”.

“Jemi nga Kosova por jetojmë në Gjermani. Hera e parë që e vizitojmë kalanë, shumë e bukur dhe me histori”.

Nga maja e kalasë dallohet horizonti i Liqenit të Shkodrës. Nga aty, në më pak se15 minuta me makinë, ndodhesh buzë liqenit më të madh të Evropës Jugore, me sipërfaqe 370 kilometër katrore.

Në Shirokë tradita e plazhit vazhdon. Kanoet janë një mënyrë e re të zbuluar të tjera sekrete të liqenit.

 “Të shumtë janë turistët që zgjedhin lundrimin me kanoe për më shumë adrenalinë. Ata kanë mundësinë të eksporojnë edhe florën e faunën nënujore”
Një destinacion i parapëlqyer është zona e zambakëve të ujit, një panoramë mes reales e fantazisë.

“Ka grupe nga Tirana, Elbasani. Ne I shoqërojmë dhe përveç bukurive natyrore ju ofrojmë birdWatching”.

Këto destinacione ofrohen edhe në paketat turistike të qytetit, përmes 13 guidave kombëtare e lokale të licensuara.

E rrethuar nga liqeni dhe dy lumenjtë Buna e Drini, Shkodra i mban dyert gjatë gjithë vitit të hapur për vizitorët dyert e mikpritjes, duke i joshur ata me bukuritë, kulturën dhe historinë e saj të rrallë.

Tv Klan  




Të ngjashme