Shpresë dhe skepticizëm për pasaportën e vaksinimit



Shpresë dhe skepticizëm për pasaportën e vaksinimit

18:10 17/01/2021

Firmat “High-Tech” gati për aplikacionet e të vaksinuarve

Ideja e kryeministrit grek Kiriakos Mitsotakis për një pasaportë vaksinimi që lejon udhëtimin lirisht në gjithë botën për të imunizuarit ka hyrë me ritme të shpejta në rrugën e realizimit ende pa nisur hedhja e hapave ligjorë nga qeveritë.

Gjigantë të teknologjisë së lartë si Microsoft, Oracle, Salesforce, etj, janë shprehur të gatshëm për të zhvilluar një pasaportë dixhitale vaksinimi, që garanton ruajtjen e të dhënave të personave të vaksinuar.

Të mbledhur rreth koalicionit “Nisma për Kredencialeve të Vaksinës” ata thonë se janë të gatshëm për një aplikacion celularësh, të cilin të vaksinuarit mund ta përdorin në çdo vend ku i nevojitet për të dëshmuar se nuk përbëjnë rrezik për përhapjen e infeksioneve, përfshirë aeroportet e sallat e koncerteve.

Vendi që po ecën me ritmet më të shpejta është Britania e Madhe, ku disa aplikacione eksperimentalë kanë nisur të testohen që tani. Ministri i Jashtëm gjerman Haiko Maas mbështeti publikisht idenë e lehtësirave për të vaksinuarit, duke propozuar që përmes këtyre aplikacioneve, ata të lejohen të hyjnë lirisht në kinema, kafene dhe muze.

Skeptikët thonë se aplikacionet mund të shndërrohen në burime të rrjedhjes së të dhënave personale në duart e palëve të treta si hakerat, apo grupet e interesit që do t’i keqpërdorin.

Ndërsa OBSH thotë se pasaporta e vaksinimit është e parakohshme përderisa efektshmëria dhe kohëzgjatja e imunitetit të vaksinave është e mbuluar me shumë paqartësi.

Tv Klan






Të ngjashme