Shqipëria, me infektimet më të ulëta në rajon për Covid




Shqipëria, me infektimet më të ulëta në rajon për Covid

15:43 16/06/2021

Vendi ynë ka vdekshmërinë më të vogël në Europë

Shqipëria ka incidencën më të ulët për infektimet e reja dhe vdekjet në 14 ditët e fundit krahasuar me vendet e rajonit dhe ato në Europë. Sipas raportimeve zyrtare të Ministrisë së Shëndetësisë, incidenca dy javore e rasteve të reja është 4.6 për 100 mijë banorë në Shqipëri dhe 8.9 për 100 mijë banorë në Kosovë.

Por bazuar në shifrat e Qendrës Evropiane për Parandalimin dhe Kontrollin e Sëmundjeve krahasuar me Italinë dhe Greqinë, Shqipëria ka dhjetëfish shifrat më të ulëta të infektimeve për 100 mijë banorë.

Kjo incidencë është më e ulët se të gjitha vendet e BE-së, të cilat luhaten në intervalin 16.5 deri ne 215.3 raste për 100 mijë persona.

Në Europë incidenca më e ulët është në Rumani 16.5 raste banorë dhe më e lartë është në Danimarkë 215.3 për 100 mijë banorë.

Po ashtu edhe incidenca dy javore e vdekshmërisë në Shqipëri është më e ulët se vendet e rajonit.  Nga data 2-15 Qershor vdekshmëria në Shqipëri është 1 vdekje për 1 milion banorë, 4-fish më pak se Kosova.

Ajo që bie në sy është se fqinji tjetër ynë, Greqia e ka vdekshmërinë 47.1 për 1 milion banorë ndërsa Italia 21.8.

Tv Klan





Të ngjashme