Kreu i Partisë Demokratike, Lulzim Basha, ka reaguar sot për situatën e rëndë që po përballet vendi për shkak të zjarreve. Në një reagim në mediat sociale, Basha shpreh mirënjohjen për punonjësit e emergjencave civile dhe forcat e ushtrisë që po përballen këto ditë me flakët.

Më tej numri një i PD hedh akuza kundër Kryeministrit Rama, pasi sipas tij ky i fundit përdor helikopterët e ushtrisë për udhëtime personale. Sipas Bashës sot ushtria dhe emergjencat nuk kanë fonde pasi paratë shkojnë për t’i shtuar privilegjet Ramës.

Mirënjohje për punonjësit e emergjencave civile dhe forcat e ushtrisë që po përballen me flakët përgjatë këtyre orëve të vështira. Pamjet që i shfaqin teksa luftojnë me mjete rrethanore janë sa pikëlluese po aq sa indinjuese kur shohim se në të njëjtën ditë, Edi Rama, i heq përballjes me zjarrin helikopterin e ushtrisë, për ta përdorur për udhëtimet e tij.

Natyrisht, kërcënimi i zjarrit është i kudondodhur në rajon, por nuk ndodh askund që në një moment krize, mjetet e pakta të mpaken edhe më shumë për t’i shtuar privilegjet një individi. Kjo nuk është papërgjegjshmëri, por modeli me të cilin është keqqeverisur dhe varfëruar vendi. Prandaj nuk ka fonde dhe mjete për t’u përballur me emergjencat, qofshin zjarre apo tërmete, sepse shteti përdoret si instrument i një pakice që punon për vete, jo për qytetarët”, është ky reagimi i kreut të PD./tvklan.al