Një aksident fatal ka ndodhur mbrëmjen e së enjtes në Fthiotida të Greqisë. Një 44-vjeçar shqiptar, i cili udhëtonte me një automjet Audi, përplasi për vdekje një djalë 14-vjeçar.
Adoleshenti Marios Letsu po lëvizte me biçikletë së bashku me vëllain e tij binjak dhe një shok kur makina e shqiptarit e vuri përpara. Shtypi grek raporton se 44-vjeçari, identiteti i të cilit nuk është bërë i ditur, rezultoi të ishte në gjendje të dehur pas testit që i bëri policia.
14-vjeçari u dërgua me urgjencë në spitalin e Lamias. Dhimbja ishte akoma më e madhe për dy prindërit e Marios, të cilët panë djalin e tyre në gjendje të rëndë. I ati i 14-vjeçarit është kirurg në spital dhe bëri çdo gjë për të mbajtur në jetë të birin. Edhe mamaja e adoleshentit është mjeke në të njëjtin spital. Ajo ishte e para që priti djali kur mbërriti i plagosur në urgjencë, para se të futej në sallën e operacionit. Fatkeqësisht, Mario nuk mundi t’u mbijetonte plagëve.
Vëllai i tij binjak ka përjetuar shok, pasi 14-vjeçari u përplas nga automjeti përpara syve të tij. Për policinë, ai është dëshmitar okular i ngjarjes. Autoritetet greke janë duke vazhduar hetimet për të përcaktuar shkakun e aksidentit dhe cilat kanë qenë rrethanat që 44-vjeçari shqiptar humbi drejtimin e mjetit dhe doli nga rruga. /tvklan.al
