Shtohen kontrollet në doganën e Kapshticës

Shtohen kontrollet në doganën e Kapshticës

16:34 26/02/2020

Shkak shfaqja e koronavirusit në Greqi

Rasti i parë me koronavirus në Greqi ka shtuar kontrollet e autoriteteve shëndetësore në pikën doganore të Kapshticës. Të gjithë qytetarët që kthehen në Shqipëri nga vendet europiane, duke kaluar tranzit në Greqi, i nënshtrohen një pyetësori për gjendjen shëndetësore dhe ju matet temperatura.

Strukturat lokale të Shëndetit Publik, pas alarmit në vendin fqinj, kanë shtuar personelin e specializuar mjekësor në doganë, të cilët do monitorojnë situatën përgjatë 24 orëve.

“Kemi rreth dy ditë që ekipi mjekësor i njësisë vendore të Devollit ka përforcuar masat duke e bërë me tre turne. Ne kemi marrë edhe personel shtesë nga njësia vendore e Korçës. Kontrollojmë të gjithë personat që futen për gjendjen shëndetësore, matet temperatura. Deri tani nuk kemi patur asnjë rast”, thotë Albert Lilo, shef i shërbimit epidemiologjik të Devollit.

Për rastet e dyshuara me koronavirus, në spitalin rajonal të Korçës janë caktuar dy dhoma izolimi, që do të shërbejnë si karantinë. Personeli mjekësor është pajisur me maska mbrojtëse, ndërsa kanë mbërritur edhe veshjet e posaçme, që do të përdoren për rastet e dyshuara me koronavirus.

Tv Klan




Grupi
LAJMET
Të ngjashme


Grupi