Shtyhet gara për aeroportin e Vlorës, masat nuk prekin rindërtimin

Qeveria ka vendosur të shtyjë për 15 ditë zhvillimin e tenderave nga të gjitha agjencitë shtetërore në kuadër të masave të marra për ndalimin e përhapjes së koronavirus.

Një urdhër i firmosur nga drejtorja e Agjencisë së Prokurimit Publik, Reida Kashta, pezullon për dy javë të gjitha prokurimet të cilat janë të hapura duke shtyrë afatin e dorëzimit të ofertave, ndërsa ndalohet hapja e tenderave të rinj.

Përjashtim do të kenë vetëm prokurimet emergjente që përfshijnë blerjen e medikamenteve shëndetësore apo që cënojnë punën dhe sigurinë e institucioneve publike.

Mes prokurimeve të shtyra është edhe tenderi ndërkombëtar për ndërtimin e aeroportit të Vlorës.

Dorëzimi i ofertave në këtë garë përfundonte më 12 Mars, por Ministria e Infrastrukturës dhe Energjisë e ka shtyrë afatin deri në fund të muajit Mars.

Pavarësisht kësaj, qeveria ka vijuar me hapjen e tenderit për zhvillimin e procesit të rindërtimit të shtëpive të prekura nga tërmeti, garë e cili nuk do të preket nga masat shtrënguese të marra për situatën.

Fondi Shqiptar i Zhvillimit hapi një ditë më parë procedurën për ndërtimin e 2500 banesave individuale në zonat e prekura nga tërmeti, ndërsa pritet që të nisë gara për rindërtimin e 890 banesave të tjera nga Bashkia e Tiranës.

Tv Klan