Situata nga Covid, reagon Meta


Situata nga Covid, reagon Meta

20:10 05/08/2020

Qeveria të shtojë buxhetin për shëndetësinë

Numri i lartë i infektimeve ditore dhe viktimave nga Covid-19 në vendin tonë, kanë sjellë reagimin e Presidentit Ilir Meta. Kreu i shtetit shpreh ngushëllimet për familjet që kanë humbur të dashurit e tyre dhe solidaritet për stafin mjekësor. Duke vlerësuar gjithashtu angazhimin dhe masat e marra nga institucionet shtetërore, Meta i bën thirrje qeverisë për të shtuar buxhetin e sektorit të shëndetësisë.

“Vlerësoj angazhimin dhe masat e marra deri tani nga institucionet përgjegjëse shtetërore kundër përhapjes së kësaj pandemie të rrezikshme, por ritmet tepër shqetësuese nga dita në ditë të shtimit të rasteve të qytetarëve të prekur dhe numrit të viktimave, shtrojnë nevojën jetike të angazhimit të të gjitha strukturave shtetërore me forca tepër të kualifikuara njerëzore dhe shkencore, veçanërisht me eksperiencë në fushën e epidemiologjisë dhe të higjienës, qofshin jashtë shërbimit aktiv, si dhe mobilizimin e një numri më të madh të reanimatorëve dhe personelit infermier në ndihmë të tyre.

Përsëris me forcë thirrjen drejtuar qeverisë për të shtuar buxhetin e sektorit të shëndetësisë, dhe marrjen pa vonesa të të gjitha masave për shtimin e ambienteve të terapisë intensive, për më shumë pajisje dhe gjithçkaje të domosdoshme që duhet për trajtimin e të prekurve. Asgjë tjetër nuk është më e rëndësishme se jeta e qytetarëve!”

Duke iu drejtuar pikërisht qytetarëve, Meta thotë se secili duhet të jetë i ndërgjegjshëm në zbatimin e udhëzimeve publike, për mbajtjen e maskave, respektimin e distancimit fizik dhe higjienë maksimale, “pasi nënvleftësimi më i vogël, jo vetëm rrezikon shëndetin dhe jetën e tij, por edhe të fëmijëve, të prindërve, të gjyshërve, të fqinjëve dhe të miqve të tij”.

“Është tepër e rëndësishme, veçanërisht në kushtet kur ndodhemi në pikun e sezonit turistik, të tregojmë përgjegjshmëri dhe bashkëpunim maksimal. Vetëm në këtë mënyrë dhe falë një solidariteti mbarëkombëtar do t’ia dalim për të tejkaluar me pasoja sa më të lehta këtë pandemi të rrezikshme duke mos lejuar përshkallëzimin e mëtejshëm të përhapjes së saj. Së bashku për të mbrojtur shëndetin e çdo qytetari!”, thotë Meta./tvklan.al




Të ngjashme