Pas dështimit të dhënies me koncesion, hidrocentrali i Skavicës do të ndërtohet nga Korporata Elektroenergjetike dhe do të prodhojë energji për konsumatorët fundorë.
Mësohet se KESH ka nisur punën për të hartuar një projekt të ri fizibiliteti, i cili do të japë përfundimisht zgjidhjen nëse Skavica do të ndahet në dy HEC-e: Katundi i ri dhe Skavica, apo do të jetë një i vetëm me një fuqi më të madhe instalimi dhe prodhimi.
Grupi i konsulentëve ka nisur punën për të bërë vlerësimin e ndikimit social dhe mjedisor të kësaj vepre, e cila më pas do t’i hapë rrugë ndërtimit të saj.
Skavica ishte hidrocentrali i parë që parashikohej të ndërtohej në kaskadën e Drinit, pjesë e tre hidrocentraleve të lumit Drin: Fierza, Komani dhe Vau i Dejës. Projekti nisi që në vitet 70’, por mbeti vetëm në letër.
5 vjet më parë ishin dy kompani turke, “Suzer” dhe “Nurol Holding”, të cilat shprehën interes për ndërtimin e kësaj vepre, por pasi qeveria miratoi ofertën e pakërkuar dhe i shpërbleu kompanitë me bonus të pikëve në garë, dy kompanitë u tërhoqën nga projekti.
Projekti në vlerësimin e parë të fizibilitetit kushton rreth 350 milionë euro, ndërsa mendohet të gjenerojë 650 milionë kilovat orë energji në vit.
Tv Klan
