Në një deklaratë të përbashkët, Garda e Republikës dhe Policia e Shtetit njoftoi nisjen e procedimit penal ndaj nënkryetarit të Partisë Demokratike, Edi Paloka, për incidentin e ndodhur këtë të enjte në Kuvend. Në një reagim të përcjellë për mediat nga Ministria e Brendshme
,
thuhet se Paloka e sulmoi Kryeministrin me një solucion kimik të parapërgatitur.
“Sot, në sallën e seancave të Kuvendit të Shqipërisë, deputeti Edi Paloka ka sulmuar me një solucion kimik të parapërgatitur Kryeministrin e Shqipërisë, z. Edi Rama. Garda e Republikës me mbështetjen e strukturave të specializuara të Policisë së Shtetit ka nisur hetimet e menjëhershme për agresionin e kryer në sytë e të gjithëve dhe gjithashtu procedimin penal kundër shtetasit Edi Paloka”,
thuhet në një reagim të përcjellë për mediat nga Ministria e Brendshme
.
Gjatë seancës së sotme, ku i pranishëm ishte edhe kryetari i Kuvendit të Maqedonisë së Veriut Talat Xhaferi, Paloka e sulmoi me bojë kreun e qeverisë, pasi ky i fundit i kërkoi ndjesë Xhaferrit për fjalimin e Lulzim Bashës. Rama e cilësoi Bashën “fëmi” dhe tha se nuk di çfarë flet.
Megjithatë vetë Partia Demokratike sqaroi se veprimi i Palokës në fakt erdhi si pasojë e bullizmit që Kryeministri, sipas saj, ushtroi ndaj nënkryetarit të PD.
“Edi Paloka e gjuajti me bojë Edi Ramën, pasi ky e talli në mënyrë të përsëritur për shkak të mënyrës së të folurit. Gjuajtja me bojë është mospranim i bullizmit të ushtruar nga Kryeministri për të cilin është dëshmitar i gjithë opinion publik.
/tvklan.al
