Policia e Tiranës njofton se ka marrë masa në lidhje me ndeshjen që do të zhvillohet këtë të shtunë në “Air Albania” mes Partizanit dhe Tiranës. Prej orës 17:00 do të bllokohen disa akse rrugore.

“Segmentet rrugore që do të jenë të bllokuara, nga ora 17:00 deri në përfundim të aktivitetit, janë: Rruga “Lek Dukagjini”, përreth stadiumit, rruga “Dervish Hima”, rruga “Gjergj Filipi”, rruga “Papa Gjon Pali II”, nga kryqëzimi me rrugën “Ismail Qemali” deri tek stadiumi “Air Albania”, bulevardi “Dëshmorët e Kombit”, nga Presidenca deri te sheshi “Nënë Tereza””, njoftoi policia.

Po ashtu janë rregulluar edhe rrugëkallimet e tifozëve.

“Lëvizja e tifozëve të Partizanit do të bëhet nga kryqëzimi i rrugës “Muhamet Gjollesha” me rrugën “Artan Lenja”, përgjatë rrugës “Muhamet Gjollesha”, rruga “Sulejman Delvina”, “Libri Universitar”, rruga “Gjergj Filipi”(COIN) – stadium; Lëvizja e tifozëve të KF Tiranës do të bëhet nga sheshi “Skënderbej”, bulevardi “Dëshmorët e Kombit, rruga “Bajram Curri”, Rruga e Elbasanit rruga “Dervish Shima”, rruga “Sheh Ahmet Paza”- stadium”, njoftoi policia.

Uniformat blu thonë se përgjatë këtyre rrugëkalimeve të caktuara nuk do të lejohet grumbullim apo kalim i tifozëve jashtë itinerarit të caktuar.

“Po në zbatim të planit të masave, do të ushtrohen kontrolle ndaj tifozëve, para hyrjes në stadium, për sende të kundërligjshme (sende të forta, bidonë uji, çadra, çelësa metalik apo lëndë piroteknike etj). Çdo tifoz duhet të jetë i pajisur me dokument identifikimi”, njoftoi policia.

Ndërkohë bëhet e ditur se në stadium nuk do të futen persona pa dokument identifikimi si dhe fëmijë nën moshën 16 vjeç pa praninë e prindit.

“Personat të cilët e kanë të ndaluar hyrjen në objektet dhe mjediset sportive, detyrohen të paraqiten fizikisht në komisariatet policore përkatëse, në ditën dhe orën e zhvillimit të veprimtarisë sportive, në zbatim të ligjit nr. 79/2017, “Për Sportin”, i ndryshuar me ligjin nr. 105/2020, dhe moszbatimi i detyrimeve që rrjedhin nga ky ligj, përbën shkelje të tij”, njoftoi policia./tvklan.al