Sot mbërrijnë në Kosovë vaksinat e para antiCovid



Sot mbërrijnë në Kosovë vaksinat e para antiCovid

09:15 28/03/2021

Në Kosovë, të dielën më 28 mars, do të arrijë kontingjenti i parë i vaksinave kundër koronavirusit, të kompanisë AstraZeneca.

Kontingjenti i parë i vaksinave, sipas një njoftimi të kryeministrisë së Kosovës, do të arrijë në aeroportin “Adem Jashari” në ora 20:15.

Ky kontingjent është në kuadër të 100.800 dozave të vaksinës së AstraZenecas që Kosova do të marrë falas nga programi COVAX, i Organizatës Botërore të Shëndetësisë.

Në njoftimin e zyrës së kryeministrit, Albin Kurti, për arritjen e vaksinave kundër koronavirusit, nuk tregohet se sasia e dozave që do të arrijnë në Kosovë. Megjithatë, ish-kryeministri i Kosovës, Avdullah Hoti kishte deklaruar se në mars do të arrinin 33.000 doza të vaksinës së AstraZenecas.

Vaksina e kompanisë britanike AstraZeneca, që e ka zhvilluar në bashkëpunim me Universitetin e Oksfordit, thuhet se është 76 për qind efektive kundër sëmundjes COVID-19.

Bashkimi Evropian po ashtu ka premtuar se do të sjellë në Kosovë vaksina kundër sëmundjes COVID-19.

Kosova është vendi i fundit në rajon që do të nisë fushatën e imunizimit të popullsisë kundër koronavirusit. Autoritetet tashmë kanë hartuar një plan të imunizimit, të ndarë në tri faza, ku fillimisht pritet të vaksinohen punëtorët shëndetësorë, të moshuarit dhe ata me sëmundje kronike./REL







Të ngjashme