Nga lotaria amerikane në festën e Farkës…?!

Nis sot aplikimi për lotarinë e përvitshme amerikane dhe në “Stop” festohet ky moment fatlum për shqiptarët. Një ditë më parë presidenti Ilir Meta ngushëlloi për tragjedinë e ndodhur në një koncert në SHBA, por në vend që të shkruante në Las Vegas, shkroi në deklaratë :Los Angeles.Të shtunën në Farkë u zhvillua aktiviteti “Farka n’fest”, që duket se i ngjan si dy pika uji festës së Pezës në 16 shtator.Renaldo ka realizuar intervista me humor në këtë aktivitet.

Apartamenti i shitur e lënë peng, investitori nuk ka para për karburant.

Sefedin Koçi, një emigrant shqiptar që jeton në Alaskë të SHBA-ve, tregon në emisionin “STOP”, historinë e tij të mashtrimit me një apartament të blerë në Kamëz. Koçi thotë se pagoi 40 mijë euro për blerjen e shtëpisë dhe 20 mijë të tjera për arredimin e saj, të cilën më pas e lëshoi me qira.

Në pritje të hipotekës nga investitori i “Riza Konstruksion”, Koçi mëson se shtëpinë e tij po e merrte përmbarimi. Gjithçka kishte ardhur për shkak të një borxhi, që ndërtuesi Meminaj i kishte marrë një tjetër personi, Edmond Lyboshës.

Në një bisedë të regjistruar mes qytetarit Sefedin Koçi dhe ndërtuesit Viktor Meminaj, ky i fundit thotë se ka ngelur trokë dhe për më tepër i merr edhe para për karburant klientit të tij të mashtruar.

“Në vitin 2008 kam blerë një apartament në Mëzez. Ia kam blerë Viktor Meminajt, para noterit kemi bërë kontratat dhe i kam paguar paratë, një vlerë prej 40 mijë eurosh. I kam paguar paratë në dorë para noterit. Në vitin 2011 kam qenë këtu unë, që më është dorëzuar ky apartament nga vetë inxhinieri me çelësa në dorë, me procesverbal”.   

Sefedin Koçi jeton në Alaskë të Shteteve të Bashkuara të Amerikës, ndaj hyrjen, që iu bleu dy sipërmarrësve, e lëshoi me qira.  

“Nga viti 2011 e deri më vitin 2017 ka qenë me qira”,

shprehet Koçi. Por 7 muaj më parë, vëllai i tij e lajmëron se kishte shkuar përmbarimi për t’i bllokuar hyrjen.

“Kur vij nga Amerika me fëmijët, shkoj dhe i bie derës, kur shoh unë një femër. I them: ‘Ça do ti këtu?’, ajo më thotë mua: ‘Ti ça do këtu?’. I them unë që kjo është hyrja ime dhe ajo më thotë që ishte me qira. I them: ‘A ka mundësi të dalësh?”, ajo thotë: ‘Jo, e ka pronari me hipotekë këtë hyrje!’.”

Sefedin tregon se apartamentin, për të cilin pagoi 40 mijë euro dhe investoi 20 mijë të tjera, e kishte blerë Edmond Lybesha me 13 mijë euro. Problemi me apartamentin ka ndodhur për shkak të kontratës që është lidhur midis investitorit të kompleksit dhe një subjekti privat.

Koçi ka zhvilluar një bisedë  me investitorin Viktor Meminaj në një kafene, ku është filmuar gjithçka nga kamera e fshehtë e emisionit “STOP”.

Investitori Meminaj –

Unë kam thënë deklaratë noteriale me ty… që të kam 40 milionë lekë.

Sefedin Koçi – Po asnjë lekë nuk i ke atij? Ta ka bërë ai me presion?

Investitori Meminaj –

Po, po! Dhe një gjë tjetër, tani janë bllokuar dy hyrje del më mbrapa, më mbrapa, që unë më ka dhënë ai përmbaruesi 17 mijë euro mua, merr vesh tani?

Sefedin Koçi – Ky, Fatos Alimadhi? Edhe ky është grup me ata apo jo?

Investitori Meminaj

Ky është brënda…

Sefedin Koçi – Ky është mafie?

Investitori Meminaj

Po, ore, po!

Sefedin Koçi – Ky është kryesori, Lybesha?

Investitori Meminaj

Me këtë e kam bërë unë deklaratën noteriale.

Sefedin Koçi – Ama, lekë s’i ke fare atij? E e ke bo kot ti atë?

Investitori Meminaj

Është bërë kot kjo. Puno me skela, gjëra, çfarë lekë, o burrë?!

Koçi tregon për emisionin “STOP”:

“Këtu është një grup mafioz, Fatos Alimadhi, Lefter Cani, “Riza Konstruksion”, Viktor Meminaj dhe Edmond Lybesha, ky që ka blerë 13 mijë euro hyrjen. Si ka mundësi ta blesh nga 60 mijë euro, që më ka shkuar mua, 13 mijë euro?”.

Por investitori vazhdon absurditetin, duke i kërkuar lekë Sefedin Koçit.

Investitori Meminaj

Tani do iki në Himarë.

Sefedin Koçi – Kaq kam unë. 50 mijë lekë.

Investitori Meminaj

Nuk më del për naftë mua…

Sefedin Koçi – Aq kam unë…

Investitori Meminaj

Do më japësh 70! Bëj çfarë të duash 70 ose 80!

Sefedin Koçi – Unë kam 50 mijë lekë.

Investitori Meminaj

T’i hedh naftë…

Sefedin Koçi – Ku do shkosh ti ?

Investitori Meminaj

Do iki në Himarëëëë … do iki në Himarë po të them unë oreee …

Sefedin Koçi – Ej! Po si je katandis kështu ore?

Investitori Meminaj

E lere tashi …

Sefedin Koçi – Na këto 50 mijë lekë, t’i kesh për naftë dhe 10,  60 …

Investitori Meminaj

Më jep edhe një 10-she tjetër!

Sefedin Koçi – S’kam, 60. A i ke për naftë deri në Vlorë, ku do shkosh?

Investitori Meminaj

Ta kem edhe një 10-she për policët rrugës.

Takimi i dytë.

Sefedin Koçi -Tani, unë po të jap 50.

Investitori Meminaj

Më jep edhe 50 të tjera … aman!

Sefedin Koçi – Hahahahahaha…

O sa keq, që je katandis more! Po si je katandis kështu?

Investitori Meminaj

Iku ajo tani … Më jep edhe një 50-she?

Sefedin Koçi – S’kam më, për Zotin!

Moszbatimi i kontratës, ku thuhej se Meminaj i kishte marrë një borxh Lyboshës, shkoi në Gjykatën e Shkallës së Parë dhe çështja iu caktua gjyqtarit Agron Zhukri, i cili vendosi që të bëhet një urdhër – ekzekutimi. Por gjyqtari ka harruar të analizojë këtë kontratë për të parë nëse bilancet financiare të “Riza Construction” janë fiktive apo të vërteta.

Në vitin 2014, në ekstraktin historik të regjistrit tregtar për të dhënat e subjektit “Shoqëri me përgjegjësi të kufizuar” nuk është deklaruar borxhi prej 40 mijë eurosh që i kishte Viktor Meminaj, Edmond Lybeshës.  

Sefedin Koçi zhvilloi një telefonatë me përmbaruesin Fatos Alimadhi.

Përmbaruesi F. Alimadhi

Unë nuk kam bërë asnjë lloj pazari me Viktorin, miku im.

Sefedin Koçi – Ashtu ëëëë?

Përmbaruesi F. Alimadhi

Po! As e kam takuar asnjëherë, në do të dish ti.

Sefedin Koçi – Ti vajte njëherë në fillim me shkep hyrjen, ti atje.

Përmbaruesi F. Alimadhi

Po lëri këto! Ç’i ke këto ti, more, për të më thënë këto gjëra mua? Po pra! Asnjëherë s’e kam takuar.

Sefedin Koçi – Je kështu, burrë i ndershëm ti ëëë?

Përmbaruesi F. Alimadhi

Po, pjesërisht.

Më pas u takua me përmbaruesin tjetër, Lefter Canin.

Përmbarues L.Cani

Unë jam me ligjin, nuk e thy dot, ligjin e kam frikë.

Sefedin Koçi -Ti ke frikë ligjin, ëë? Për të shkatërruar shtëpi, ti s’ke frikë ë?

Përmbarues L. Cani

Po pati urdhër – ekzekutimi, zbato ligjin, nuk të gjen gjë asnjëherë.

Shko merri lekët dhe mos më hajde mu! Shko merrja lekët atij, se ka lokal, ka dyqan, ka shtëpia. Ik e merrja!

Meqenëse përmbaruesi Cani është në dijeni të pronave të tjera të Viktor Meminajt, pse nuk sekuestroi ato, por sekuestroi apartamentin që i ishte shitur Sefedin Koçit?

“Kërkoj nga prokurori i përgjithshëm që kjo hyrje të bllokohet, kush ka paguar paratë ta marrë!”

, shprehet i revoltuar Koçi.

Tenderi me shkelje i lavanterisë në spitalin e Durrësit, faji “top futbolli”.

Emisioni “STOP” i rikthehet tenderit problematik të lavanterisë në spitalin e Durrësit, që parashikon shpenzimin e 1.5 miliardë lekëve në 3 vjet.

Juristja e prokurimeve “ia kalon topin” kreut të KVO-së, Endrit Shehut, ndërsa ky i fundit mjaftohet të thotë se do të shprehet gjykata. Po kështu drejtoresha e komanduar, Çikalleshi deklaron se do të mbajë përgjegjësi, nëse gjykata e nxjerr procedurën me shkelje.

Spitali i Durrësit, në fillim të vitit 2017 ka kërkuar shërbimin e lavanterisë, pra një kompani private që merret me pastrimin e ndërresave të shtretërve, uniformave të mjekëve dhe infermierëve.

Tenderimi u bë pranë Agjencisë së Prokurimit Publik, ku morën pjesë 5 operatorë.

Më datë 26 Qershor 2017 u përzgjodh operatori fitues, kompania “Sanitary Cleaning”, e cila përbëhet nga 3 kompani. Shoqëria italiane “A.G.LAUNDRI” SRL mori përsipër të kryejë 60 % të shërbimeve, subjekti “MIMOZA DELIU”, si person fizik, 30% dhe “Sanitary Cleaning” ndërmori 10%.

Por emisioni “STOP” provoi që dokumentet nuk janë dorëzuar në bazë të ligjit të tenderit, pasi shumica e tyre nuk janë origjinale, por fotokopje.  

Subjekti “MIMOZA DELIU” nuk ka kapacitetin e duhur për të zhvilluar shërbimin e lavanterisë, gjithashtu ka probleme në dokumentacionin që ka dorëzuar në OSSHE dhe faturat tatimore. Ndërsa “Sanitary Cleaning” nuk ka dorëzuar kontratën origjinale të qerasë, por një fotokopje të saj.

Prokura e Xhovana Leonardit nga shoqëria “A.G.LAUNDRI” SRL është totalisht në shkelje, pasi procedura është bërë më 24 Qershor 2017, ndërsa pajisja me vulë apostile është bërë më 26 Qershor 2017.

Ndaj gazetari i emisionit “STOP” iu drejtua Presidentit të Dhomës Kombëtare të Noterëve, për të komunikuar me zv. presidentin Fatmir Lace.

“Çdo noter e ka shumë të qartë se edhe Italia është një vend aderues i kësaj konvente, që për të përdorur një dokument të bërë në një shtet të huaj duhet të ketë vulë apostile. Pa këtë vulë kuptohet që nuk duhet të kryhen veprime!”.

Nëndrejtori i spitalit, Endrit Shehu u shpreh se dokumentacioni i nevojshëm për tenderin e zhvilluar gjendet online dhe pranoi që ka qenë kryetar i Komisionit të Vlerësimit të Ofertave. I vendosur në pozitë të vështirë para pyetjeve të gazetarit thotë: 

“Në momentin që ai sjell dokumente, të cilat dyshohen se nuk janë origjinale nga ana juaj, atëherë nuk lidhet kontrata”.

Por çuditërisht kontrata është lidhur, ndaj gazetari i emisionit “STOP” është rikthyer pranë administratës së spitalit të Durrësit për të komunikuar sërish me juristen Çikalleshi dhe kreun e KVO-së.

Gazetari – Ju si juriste, si mund të lidhni kontratë me këtë subjekt?

Juristja –

Unë me këtë subjekt kam lidhur kontratë sepse kam nga KVO-ja një raport përmbledhës. Kështu që në momentin që unë kam një raport përmbledhës …

Gazetari – Çfarë thotë konkretisht raporti?

Juristja –

Nuk mund të të them mbi këtë gjë asnjë lloj informacioni, përderisa kjo është një çështje që i ka kaluar gjykatës. Do marri gjykata vendim mbi këtë çështje!

Gazetari – Po pse ta lejmë që në fillim që të bëhet e gjithe procedura gabim?

Juristja – Prandaj është edhe gjykata që ta vlerësojë ajo nëqoftëse janë bërë shkelje nga ana e KVO-së a ku di unë se çfarë ke ti aty.

Ndërsa kreu i Komisionit të Vlerësimit të Ofertave dhe gjithashtu nëndrejtori i spitalit tha se dokumentet e gjendura online janë ballafaquar me dokumentet e noterizuara, duke rezultuar të njëjtat.

“Lidhur me këtë, meqënëse më the t’i ballafaqoja dokumentet, unë i kam ballafaquar dhe janë të noterizuara. Jo vetëm unë, edhe grupi, se jemi 5 anëtarë në këtë. Unë mendoj që ne kemi bërë punën tonë, aq sa na takon neve dhe janë instancat përkatëse që mund të vazhdojnë punën e vetë, të shohin, ta ballafaqojnë. Ne jemi ballë-hapur për punën tonë të pastër, duke zbatuar ligjin ndërkombëtar!”

Gazetari i emisionit “STOP” i drejtohet drejtoreshës së spitalit Durrës, Viola Çikalleshit.

Drejtoresha Çikalleshi –

Deri në momentin që është në gjykatë, ndoshta mund të ketë edhe nëpër institucione të tjera çështje. Të përfundohet në momentin që ju keni realizuar një emision …

Gazetari – Është referuar në Prokurori ky rast nga ju për shembull?

Drejtoresha Çikalleshi –

Nga ne vetë? Jo! Nuk është referuar, ne … Prokuroria mund ta hapë çështjen edhe me iniciativë nga ju, se besoj, kam dëgjuar raste që e bëjnë këtë gjë dhe shumë mirë do ishte që ta hapte që ne një herë e mirë të marrim vesh, kjo punë është apo nuk është në rregull, edhe të fillojmë shërbimin. Gabimet janë njerëzore. Shpresoj që nuk ka asnjë gabim që kryen vepër penale dhe kaq.

Gazetari – “Sanitary Cleaning” është bashkimi i 3 operatorëve. Thuhet që njëri nga 2 operatorët, ata që janë shqiptarë, kanë një lidhje farefisnore me ju.

Drejtoresha Çikalleshi –

Me kë? Me mua personalisht? Unë nuk njoh asnjë nga 3 operatorët. Përveçse i kam takuar këtu, në momentin që kanë ardhur për të lidhur kontratën.

Gazetari – E kanë lidhur kontratën?

Drejtoresha Çikalleshi –

Po! Kontrata është lidhur se ju keni marrë njoftimin në sistem. Kemi vazhduar me shërbimin, për aq kohë sa nuk u mor ndonjë veprim pengues nga gjykata. Ta zgjidhi gjykata!

Gazetari – Po çështja është në gjykatë…

Drejtoresha Çikalleshi –

Është në gjykatë, por nuk ka nxjerrë asnjë vendim, që të na pengojë vazhdimësinë e procedurës.

Pra kontrata mes spitalit të Durrësit dhe “Sanitary Cleaning”, e përbërë nga 3 shoqëri, është lidhur edhe pse çështja vazhdon të jetë në gjykatë.