Presidenti turk Recep Tayyip Erdogan la të kuptohej të premten se do të ishte i hapur për të zbutur tensionet me Greqinë fqinje, duke hedhur mundësinë e një takimi ballë për ballë me Kryeministrin grek, një qëndrim ky që vjen pas disa muajsh përplasjesh mbi burimet e energjisë në Mesdheun Lindor.
Erdogan i tha gazetarëve se pas lutjeve në Stamboll, ishte ‘pozitiv’ për të marrë në konsideratë një takim më kryeministrin grek Kyriakos Mitsotakis, që tha se ky i fundit e kishte kërkuar.
Presidenti turk tha se ministrat e Jashtëm të dy vendeve ishin takuar në të shkuarën dhe se bisedimet bilaterale vijojnë. “Kështu, ne thamë se mund të bëjmë hapin për bisedime mes përfaqësuesve tanë specialë dhe më pas mund të ndodhë edhe takimi mes meje dhe kryeministrit”.
Marrëdhëniet mes dy vendeve arritën pikë kulmore gjatë verës për shkak përplasjeve për kufijtë detare dhe të drejtat mbi energjinë, përplasje që për pak sa nuk përfunduan në luftë.
Më herët gjatë kësaj jave të dy vendet njoftuan rinisjen e bisedimeve më 25 Janar. Këto bisedime janë zhvillimet e fundit të një procesi në vijimësi të negociatave mes Greqisë dhe Turqisë që synojnë përmirësimin e marrëdhënieve të tyre shpesh të tensionuara.
Një zyrtar i qeverisë greke tha se pala e tyre e sheh mundësinë e takimit midis dy liderëve si pozitive, nëse klima aktuale pozitive do të vijojë. Sipas asaj që shkruan e përditshmja The Independent, zyrtari grek tha se Kryeministri Mitsotakis kishte shprehur në mënyrë të vazhdueshme dëshirën e tij për kanale të hapura komunikimi me Turqinë në nivelet më të larta./tvklan.al
