Pas zbardhjes se vendimit të Gjykatës së Posaçme të Apelit për ish-Ministrin e Brendshëm, Saimir Tahiri dhe ish-Drejtorin e Policisë Vlorë, Jaeld Çela, që e riktheu çështjen për rigjykim në Shkallë të Parë, ka reaguar Tahiri.
Në një postim të bërë së fundmi në Facebook, ish-ministri ka zgjedhur që komentin e tij ta bëjë përmes ironisë, duke ritheksuar se vendimi është politik.
“Edhe “në emër të Politikës”… Beteja vazhdon”, shkruan ai, bashkangjitur fotos së fletës së vendimit ku thuhet “ Vendim në emër të Republikës”.
Ndërkaq , gjykata vëren se kërkesa e Tahiri për ta shpallur të pafajshëm meqenëse Gjykata e Katanias nuk e ka hetuar apo dënuar, nuk e shfaqëson ish-Ministrin e Brendshëm në Shqipëri.
Gjykata e Posaçme e Apelit thekson se ka vendosur të rikthejë për shqyrtim dosjen, pasi akuza e kultivimit të kanabisit është kontradiktore pasi u shtua gjatë hetimeve nga prokuroria dhe duhen gjetur provat.
Gjithashtu gjykata vlerëson se Saimir Tahiri e Jaeld Çela janë dënuar për shpërdorim detyre, por për këtë akuzë dy të pandehurit nuk janë mbrojtur, pasi nuk u ishte komunikuar nga organi i akuzës. Sipas Apelit, Shkalla e Parë gaboi në rikualifikimin e veprës penale.
Këto gjetje të Gjykatës së Posaçme të Apelit, kanë bërë që çështja e Tahiri të rikthehet për rigjykim, pas 3 vitesh. Më herët Saimir Tahiri e ka quajtur të qëllimshëm dhe të padrejtë zvarritjen që po i bëhet hetimeve. /tvklan.al
