Presidenti i SHBA-së, Donald Trump dhe homologu i tij ukrainas, Volodymyr Zelensky kanë zhvilluar një takim në Shtëpinë e Bardhë ku në fokus është lufta në Ukrainë. Gjatë fjalës së tij, Trump i ka thënë Zelenskyt të jetë mirënjohës teksa e ka akuzuar atë se po “luan bizhoz me Luftën e Tretë Botërore”.
Sipas gazetarëve brenda dhomës, Zelensky, Zëvendëspresidenti i SHBA, JD Vance dhe Trump kanë pasur një seri shkëmbimesh të tensionuara. Ndërkohë, Vance e ka quajtur Zelenskyn “mosrespektues”.
Gjatë takimit, Presidenti Zelensky e ka pyetur Zv/Presidentin Vance nëse ai ka qenë në Ukrainë për të parë problemet e tyre. Ndërkohë, Vance shprehet se ka lexuar dhe ka parë. Më pas, Zelensky tund kokën duke i thënë se edhe SHBA-ja do të ndjejë pasojat e luftës.
Trump shfaqet dukshëm i frustruar, duke ndërhyrë: Mos na tregoni se çfarë do të ndjejmë. Ju nuk jeni në gjendje të diktoni se çfarë do të ndjejmë. Do të ndihemi shumë mirë dhe shumë të fortë.
Pjesë nga diskutimi Zelensky-Trump-Vance:
Trump: Ajo që po bëni është mungesë respekti për vendin, ky vend që ju ka mbështetur shumë.
Zelensky: Unë kam shumë respekt për vendin tuaj.
Zëvendëspresidenti Vance e ndërpret: A keni thënë ‘faleminderit’ një herë gjatë gjithë takimit?
Zelensky: Shumë herë.
Vance: Ofroni disa fjalë vlerësimi për SHBA-në dhe Presidentin që po përpiqet të shpëtojë vendin tuaj.
Zelensky përpiqet të përgjigjet, duke thënë: Ju lutem, mendoni se nëse do të flisni shumë me zë të lartë për luftën…
Ai ndërpritet nga Trump: Vendi juaj është në telashe të mëdha.
/tvklan.al
