7 emigrantë shqiptarë u arrestuan pasi u gjetën të fshehur në një anije mallrash në Dorset të Britanisë së Madhe.
Sipas asaj që shkruan e përditshmja britanike DailyMail, shërbimet e emergjencës morën një telefonatë nga Chise Bulker, rreth orës 05:40 të së martës, që raportonte se një person në bord kishte nevojë për ndihmë mjekësore.
Shumë shpejt u zbulua se në bordin e anijes ishin fshehur 7 persona të paidentifikuar dhe në të vërtetë asnjë prej tyre nuk kishin nevojë për ndihmë mjekësore.
Anija 178 metra e vitit 2014 dhe me flamur të Panamasë, ankoroi në port mesditën e kësaj të mërkure, më shumë se 24 orë pasi kërkoi ndihmë.
Policia thotë se nuk ka asnjë të dhënë se personat që ndodheshin në bord tentuan të merrnin peng anijen në asnjë moment, pavarësisht deklaratave se kapiteni i anijes ishte dëgjuar duke kërkuar ndihmë në radio mëngjesin e së martës.
Anija ishte ngarkuar një javë më parë në Rouen të Francës, ndërsa më herët kishte qenë në Algjeri, Tunizi, SHBA e Meksikë.
Shqiptarët u arrestuan për emigracion të jashtëligjshëm, ndërsa autoritetet po marrin në pyetje ekuipazhin e anijes për të zbardhur ngjarjen./tvklan.al
