Deklaratave të forta të SHBA-së dhe BE-së kundër veprimeve të qeverisë së Kosovës në veri të vendit iu është bashkuar Gjermania. I dërguari i posaçëm i Berlinit, Manuel Sarrazin, mbërriti me urgjencë në Prishtinë pas tensioneve të krijuara të premten, duke takuar komandantin e KFOR-it dhe kryeministrin Kurti.
Ai udhëtoi edhe drejt Mitrovicës ku ishte i ashpër me Kosovën duke thënë se Bashkësia Ndërkombëtare nuk do të lejojë që të hidhen poshtë arritjet e marrëveshjes së Ohrit.
“Porosia jonë është se ne nuk do të lejojmë që këto mundësi nga marrëveshja e Ohrit të hidhen poshtë nga ndonjë budallallëk”, tha Sarrazin.
Sarazin pa nga afër situatën në urën e Mitrovicës. Ai nuk iu përgjigj pyetjes së Tv Klan nëse pret që kryeministri Kurti të tërhiqet nga veprimet në veri.
Edhe NATO ka kërkuar çtensionimin e menjëhershëm të situatës në veri. Por pavarësisht apelit të SHBA dhe BE, kryeministri Albin Kurti nuk tërhiqet duke u shprehur se i kupton shqetësimet e ndërkombëtarëve, por nuk ka opsion tjetër përveç përmbushjes së detyrimeve.
Të shtunën situata në tri komunat veriore ishte e qetë. Në Leposaviç ka shkuar në vendin e tij të punës kryetari i ri, i cili ka pritur ministrin e Brendshëm Xhelal Sveçla. Ndërsa kryetarët e Zubin Potokut dhe Zveçanit nuk kanë shkuar në zyrë pasi kanë deklaruar se është ditë pushimi.
“Flamuri i Kosovës është vendosur edhe në objektin e komunës së Zveçanit ndërsa janë hequr ata të Serbisë dhe UNMIK-ut. Policia po kujdeset për sigurinë këtu”, raportoi gazetarja Blerta Dalloshi Berisha.
Nisur nga kjo situatë, Lista Serbe i ka kërkuar presidentit të Serbisë Aleksandër Vuciç ndërprerjen e dialogut.
Tv Klan
