Telefonata “e gabuar”, detajet nga arrestimi i Xhepajt. Si u zbulua banesa ku fshihej



Telefonata “e gabuar”, detajet nga arrestimi i Xhepajt. Si u zbulua banesa ku fshihej

10:38 28/06/2020

Është vënë në pranga nga Policia e Shtetit Ilir Xhepaj, 33-vjeçari  i cili akuzohet si bashkëpunëtor në vrasjen e Bujar Likës dhe Paulin Gjergjit.

Xhepaj u arrestua mbrëmjen e 27 Qershorit në zonën e Astirit në kryeqytet. Policia kishte informacione se Xhepaj strehohej në një apartament të marrë me qira, në vendin ku dhe u  prangos.

Ilir Xhepaj, foto siguruar nga Klan Plus

Burime për Klan Plus bëjnë me dije se i akuzuari si bashkëpunëtor i Eduard Lamajt, nuk ka pranuar të flasë përpara grupit hetimor, duke thënë se do të shprehet në një moment të dytë.

Gazetarja Aida Topalli raporton se policia ka pasur në përgjim edhe bashkëshorten e Ilir Xhepës, përgjime të cilat kanë bërë të mundur lokalizimin e 33-vjeçarit.

Telefonata e fundit e Xhepës rezulton të jetë me një person që jepte banesa me qira. Pasi ka mbaruar telefonatën, i arrestuari ka zbritur në hyrje të pallatin ku banonte për të takuar personin e sipër përmendur.

Emri i personit që ka takuar Xhepa për herë të fundit, nuk bëhet me dije për shkak të hetimeve. Në momentin që ka takuar personin, efektivë të komisariatit të Kurbinit në bashkëpunim me forcat operacionale të drejtorisë së përgjithshme të policisë së Shtetit, kanë vepruar menjëherë duke e prangosur.

“Mos lëviz! E kapëm!”

Janë këto fjalët e punonjësve të efektivëve që vunë në pranga Ilir Xhepajn. Rreth orës 22:30 minuta një person kalon me shpejtësi në rrugën Demneri në zonën e Astirit në kryeqytet. Pas këtij veprimi ai arrin të fshihet poshtë një makine të parkuar në rrugë.

Menjëherë në zonë kanë zbarkuar forcat operacionale të policisë së shtetit duke rrethuar zonën dhe konkretisht pallatin ku jetonte Ilir Xhepa. Për rreth 1 orë Xhepaj ka qendruar poshtë makinës i fshehur. Ai u pikas nga forcat operacionale dhe me pas u bë i mundur arrestimi i tij.

Nga ana tjetër 33-vjeçari është një emër shumë i njohur për drejtësinë. Më 15 Janar 2020 ai ka qëlluar ndaj Zef Markut. Ky i fundit arriti t’i shpëtojë këtij  atentati. Edhe pse ishte një person në kërkim ai lëvizte shpesh. Si pjesë e grupit të Eduard Lamaj ai akuzohet për 3 vepra penale, si “Vrasje me dashje, e kryer në bashkëpunim”, “Vrasje e mbetur në tentativë”, si dhe “armëmbajtje pa leje”.

Klan Plus




Të ngjashme