Një tragjedi ka ndodhur në fshatin Koretin të Kamenicës, ku pesë anëtarë të familjes Basha kanë humbur betejën me Covid-19 brenda muajit të fundit.
Kryetari i Këshillit Lokal të fshatit, Sejdi Kurteshi, ka dhënë më shumë detaje lidhur me këtë rast tragjik.
“Relacioni mes këtyre viktimave është nëna, dy djemtë dhe dy motrat të cilët kanë humbur jetën nga COVID-19. Në fshatin tonë janë gjithsej shtatë viktima. Fshati jonë nuk po shpëton nga kjo katrahurë. Është një gjendje e rëndë dhe e dhimbshme”.
Ai ka treguar edhe se cila ishte mosha e pesë anëtarëve të familjes Basha që kanë ndërruar jetë nga COVID-19.
“Nëna ishte diku mbi moshën 80 vjeçare. Njëri djalë ishte 62 vjeçar, derisa tjetri 48 vjeçar. Për dy motrat nuk e di saktësisht se cila ishte mosha e tyre, pasi janë të martuara në një fshat tjetër, por janë në lidhje familjare”.
Përfaqësuesi i Shoqatës Humanitare “Koretini”, Adhurim Maka, ka treguar se janë mobilizuar që familjen Basha ta ndihmojnë me mjete financiare në këto ditë tejet të rënda.
“Ne kemi kontaktuar me kryesinë e shoqatës në Zvicër dhe kemi siguruar ndihma fillestare për këtë familje të cilat shpresojmë t’i dorëzojmë nesër. Në ndërkohë edhe në fshat do të mobilizohemi që t’iu gjendemi afër për aq sa kemi mundësi. Për sonte kemi siguruar një ndihmë prej 1000 eurosh. Do të kontaktojmë edhe me anëtarët e familjes që të shohim se si janë nevojat e tyre dhe do të mobilizohemi që t’i mbështesim financiarisht dhe në të gjitha aspektet”.
Maka ka thënë se kjo ngjarje e ka tronditur fshatin Koretin.
“Në fshat është një qetësi e frikshme. Një lajm që ka na stepur të gjithëve dhe na ka lënë pa fjalë. Të gjithë jemi të prekur dhe të trishtuar me këtë lajm që e kemi marrë sot. Ndoshta kjo është familja që COVID-19 e ka goditur më së rëndi në gjithë Kosovën”./KlanKosova
