Nënkryetarja e Kuvendit të Kosovës Vjosa Osmani ka reaguar pasi strukturat drejtuese të Lidhjes Demokratike të Kosovës e shkarkuan nga të gjitha funksionet që kishte në parti.
Në një postim në Facebook, Osmani shkruan se u shkarkua për shkak se mbrojti vlerat parimore për të cilat ishte betuar. Ajo thotë se ky është çmimi që duhet paguar për të qenë parimor. Por, Vjosa Osmani nuk stepet nga beteja e saj politike, pavarësisht vendimit të partisë së saj që e shkarkoi nga postet drejtuese.
Të gjithë anëtarët e këshillit që votuan për shkarkimin e saj si nënkryetare e LDK me kërkesë të kryetarit Isa Mustafa, Vjosa Osmani i fton që të përballet me ta përpara qytetarëve në zgjedhjet e radhës.
Nënkryetarja e Parlamentit të Kosovës shprehet se vetëm qytetarët e Kosovës do të mund ta rrëzojnë dhe askush tjetër.
Vjosa Osmani u shkarkua nga funksionet drejtuese në partinë e saj LDK pasi nuk votoi qeverinë e re të Avdullah Hotit në Kosovë.
Reagimi i Vjosa Osmanit:
Po përjashtohem e diferencohem sepse:
Thashë kurrë me të korruptuarit, dhe ashtu mbeti;
Thashë do t’i sjellim Kosovës ndryshimin e jo mendësinë e vjetër në pushtet, dhe ashtu mbeti;
Thashë se nuk do ta përkrahë asnjë tregtar të kufijve e të sovranitetit, dhe ashtu mbeti.
Thashë për Kosovën do të kërkojmë barazi nëpërmjet reciprocitetit, dhe ashtu mbeti;
Thashë se askujt nuk do t’i punojmë pas shpine, dhe ashtu mbeti;
Pra, u diferencova e shkarkova sepse e mbajta fjalen. U diferencova edhe për shkak se jam grua, sepse asnjë nënkryetar burrë në të kaluarën, edhe kur kanë kundershtuar e vepruar kundër vendimeve të partisë, nuk janë përjashtuar.
Por, të dashur qytetarë të Kosovës, sistemet që themelin mbi të cilin qëndrojnë e kanë diferencimin, janë gjithnjë të destinuara të dështojnë. Kështu ka qenë në të kaluarën, e kështu do të jetë edhe tash e tutje, të jeni të bindur. Prandaj po e përsëris atë që e kam thënë në Kuvend më 25 mars:
Në politikë, sikur edhe në jetë, ndonjëherë duhet ta paguash çmimin e të qenit parimor. Unë e kam provuar në lëkurën time më shumë se njëherë. Por, parimësia tregon udhën e vërtetë, edhe kur ajo është e mbushur përplot gjemba. E, unë nuk përtoj t’u rrekem këtyre pengesave për ta bërë të dukshme dritën, edhe nëse kjo nuk kuptohet nga disa mendjeshkurtër që sot votuan për përjashtimin e diferencimin tim. Por është një udhë që unë e kam ndjekur këto 20 vjet e ajo është udha që ta shtron besimi qytetarë dhe asaj nuk e kam ndërmend t’i ndahem kurrë. Në secilën betejë, do të jem me qytetarët, deri në fund.
I falenderoj 53 anëtarët e Këshillit të Përgjithshëm që nuk u bënë pjesë e këtij diferencimi politik. Ndërsa për diferencuesit e sotëm, shihemi në garën zgjedhore së shpejti. E aty do ta shohim se kush do të fitojë kur të dalim para qytetarëve. Gara e vërtetë është para qytetarëve, edhe pse shumica dërmuese prej jush diferencues, jeni aq frikacakë sa nuk do të guxoni të dilni në atë përballje, por sërish do të fshiheni prapa dikujt tjetër. Por përballja e madhe do të ndodhë. Mua më ka ngritur populli dhe vetëm ai do të mund të më rrëzojë. /tvklan.al
