Bisedimet mes Ukrainës dhe Rusisë ditën e sotme në Stamboll nuk rezultuan me një armëpushim. Megjithatë palët kanë rënë dakord në një pikë. Shkëmbimin e 1 mijë të burgosurve të luftës.
Kjo, sipas palës ukrainase, ishte edhe prioriteti i parë në bisedime.
Ministri i Mbrojtjes së Ukrainës, Rustem Umerov, duke folur për gazetarët në Stamboll, e përshkroi këtë si një “arritje të rëndësishme” që “tregon se jemi të fokusuar për ta përfunduar këtë luftë”.
Prioriteti i dytë i ukrainasve ishte diskutimi i një armëpushimi. Palët kanë “shkëmbyer disa modalitete” dhe ekipet po punojnë për të “shkëmbyer detajet”.
Prioriteti i tretë i palës ukrainase është që takimet e radhës të jenë të nivelit të lartë.
“Mendoj se hapi i radhës që duhet të organizohet është një takim i nivelit të liderëve”, tha Umerov, duke përsëritur se “Ukraina do paqe”.
Kreu i delegacionit rus, Vladimir Medinsky, tha se pala e tij ishte “përgjithësisht e kënaqur” me takimin. Sipas tij, palët pranuan që të paraqesin vizionin e tyre për një armëpushim, pas të cilit mund të vijojnë bisedimet.
Medinsky tha se Moska e “ka marrë shënim” kërkesën e Ukrainës që presidenti Vladimir Putin të takohet me homologun e tij Volodymyr Zelensky.
Zëdhënësi i ministrisë së Jashtme të Ukrainës, Heorhii Tykhyi, u shpreh për mediat se kishte disa kërkesa nga Rusia që janë të “papranueshme” nga Ukraina.
Sipas kreut të delegacionit rus, Moska i shikon bisedimet si një vazhdim të atyre që dështuan në vitin 2022. Ukraina nga ana tjetër e ka kritikuar delegacionin e Putinit se nuk është ngarkuar për të prodhuar negociata serioze.
“Rusia dërgoi pothuajse të njëjtët njerëz që çoi edhe në 2022-shin. Ata tregojnë se Rusia nuk ka ndryshuar shumë nga qasja e saj. Po bëjnë gjithçka që ta kthejnë takimin në Stamboll në një proces bosh”, tha Zelensky nga Shqipëria, ku sot ishte pjesë e samitit të Komunitetit Politik Europian.
Por kush ishin të deleguarit e të dyja palëve në Stamboll?
Për delegacionin rus:
Vladimir Medinsky, këshilltar i Vladimir Putin
Alexander Gomin, zv/ministër i mbrojtjes
Mikhail Galuzin, zv/mininistër i jashtëm
Igor Kostyukov, drejtori i Agjencisë së Inteligjencës Ushtarake
Për delegacionin Ukrainas:
Rustem Umerov, ministër i Mbrojtjes
Oleksandr Poklad, zv/shef i Shërbimeve të Inteligjencës së Brendshme
Oleksiy Shevchenko, zv/drejtues i stafit të përgjithshëm të Forcave të Armatosura
Serhiy Kyslytsia, zv/ministër i Çështjeve të Jashtme
Oleksandr Bevz, negociator dhe dhe ndihmës i shefit të kabinetit të Zelenskyt
Pala ndërmjetëse:
Hakan Fidan, ministri i Jashtëm i Turqisë.
/tvklan.al
