Një valë e pazakontë e të nxehtit me temperatura që i kalojnë 40 gradë Celsius ka përfshirë Rio de Zhaneiron.
Të hënën në qytetin brazilian termometri shënoi 44°C. Autoritetet e qytetit rekomanduan që banorët të shmangin ekspozimin ndaj diellit dhe të jenë të hidratuar.
Vapa intensive është krahasuar me kushtet e shkretëtirës, duke ndikuar në jetën e përditshme dhe punën.
Kjo valë e pazakontë e të nxehtit ka ndikuar tek turistët dhe banorët të cilët e kanë përshkruar situatën si të padurueshme.
Si pasojë e temperaturave të larta plazhet, ishin të mbushura me njerëz këtë fundjavë në Rio, veçanërisht në Copacabana.
Vala e të nxehtit goditi Rio de Zhaneiron më pak se dy javë përpara karnavaleve të famshme.
Por teksa Brazili është përfshirë nga kjo valë e pazakontë e të nxehtit, në SHBA autoritetet kanë paralajmëruar për “një të ftohtë të rrezikshëm”, me temperatura që parashihen të bien deri në – 51 gradë Celsius në Montana, të shoqëruara me erëra të forta.
Meteorologët thonë se disa shtete do të përjetojnë stuhinë e dhjetë dhe më të ftohtën për këtë stinë, që po vjen nga drejtimi i Arktikut.
Në Dakotën e Veriut, erërat e ftohta dhe temperaturat e ulëta pritet të zbresin deri në – 50 gradë Celsius.
Klan News
