Ka reaguar sërish pak minuta më parë kreu i qeverisë Edi Rama, ndërsa bën me dije se vendet fqinje po i vijnë në ndihmë Shqipërisë pas goditjeve të forta të tërmetit.
Në një postim në Twitter, kryeministri njofton se kryeministri Conte e kryeministri Mitsotakis kanë nisur me skuadrat special, ndërsa Presidenti Macron e Presidenti Erdogan shprehën gatishmërinë për çdo nevojë.
Po ashtu edhe Ambasadat e BE/SHBA kanë njoftuar për gatishmëri, ndërsa nuk ka munguar reagimi nga Presidenti Thaçi, i cili ka aktivizuar skuadrat speciale të FSK drejt zonave të krizës emergjente për nxjerrjen e njerëzve ende nën rrënoja.
Ndërkohë skuadra speciale janë nisur edhe nga Mali i Zi, Maqedonia e Veriut dhe Serbia, Gjermania e Bullgaria.
“Kancelarja Merkel ka vënë në lëvizje mekanizmin e ndihmës në emergjencë Kryeministri i Maqedonisë së Veriut, Zaev, dhe Kryeministri i Bullgarisë, Borisov, shprehën gatishmërinë për të aktivizuar mekanizmat e tyre të ndihmës
Kryeministri i Malit të Zi, Markoviç, njoftoi se një skuadër speciale mbështetje për të dëmtuarit po niset drejt Shqipërisë dhe po njësoj, një tjetër skuadër mbështetëse nga Serbia e specializuar në raste emergjencash, po niset drejt vendit tonë, më komunikoi Presidenti Vuçiç.
Të gjithë miqtë e Shqipërisë po aktivizohen me shpejtësi. Kryeministri Conte e kryeministri Mitzotakis nisën avionët me skuadrat speciale. Presidenti Macron e Presidenti Erdogan më shprehën gatishmërinë për çdo nevojë. Ambasadat e BE/SHBA kanë njoftuar qysh herët gatishmërinë.
Qysh herët më ka telefonuar edhe Presidenti Thaçi, i cili ka aktivizuar skuadrat speciale të FSK drejt zonave të krizës emergjente për nxjerrjen e njerëzve ende nën rrënoja. Vazhdojnë kontaktet, ndërkohë që në terren po bëhet gjithçka e mundur në pikat ku kushtet janë më të rënda“. /Tvklan.al
