Komisioni nuk do të shprehet pas vendimit të Kushtetueses
Komisioni i Venecias nuk e ka trajtuar kërkesën e Kryeministrit në detyrë Albin Kurti për opinion të këtij komisioni në raport me kompetencat e Presidentit.
Në njoftimin që ka bërë qeveria në detyrë kanë bërë me dije se komisioni ka vlerësuar që të respektojë vendimmarrjen e Gjykatës Kushtetuese.
“Pasi Gjykata Kushtetuese ka marrë vendim për vendosjen e masës së përkohshme deri më 29 Maj, duke e pezulluar veprimin e Dekretit të Presidentit, dhe meqë Gjykata po e trajton këtë çështje, Komisioni ka vlerësuar që të respektojë vendimmarrjen e Gjykatës Kushtetuese, pasi veçse ka vepruar. Ne e mirëpresim sugjerimin e Komisionit për të respektuar e pritur shqyrtimin e kërkesës dhe vendimin e Gjykatës Kushtetuese. Pas trajtimit nëse shihet nevoja për sqarime shtesë dhe ndihmë për opinion nga Komisioni, do të ndërmarrim hapat e nevojshëm”, thuhet në njoftimin e zyrë së Kurtit.
Pas dekretimit të Avdullah Hotit për Kryeministër të vendit nga Presidenti, Lëvizja Vetëvendosje e ka dërguar çështjen në Gjykatën Kushtetuese derisa ka kërkuar edhe pezullimin e dekretimit deri në një vendim final.
Për kërkesën e fundit Gjykata Kushtetuese kishte marrë vendim në favor të LVV-së për çka edhe u anulua seanca për votimin e qeverisë Hoti. Krahas kësaj qeveria në detyrë kishte kërkuar edhe opinionin e Komisionit të Venecias.
Tv Klan
