Pak orë pas incidentit të shënuar në parlament, ku deputetët e opozitës bllokuan foltoren e Kuvendit dhe goditën me vezë në drejtim të Kryeministrit Rama dhe kabinetit qeveritar, Kryetari i Grupit Parlamentar të Partisë Socialiste, Gramoz Ruçi, i ka dërguar një letër Kryetari të Kuvendit, Ilir Meta, ku i kërkon mbledhjen e menjëhershme të Byrosë së Kuvendit, me qëllim përjashtimin deri në 10 ditë, të 3 deputetëve të opozitës që qëlluan me vezë gjatë seancës plenare.

Ja letra e plotë:

Të nderuar kolegë,

Grupi Parlamentar i Partisë Socialiste ndjehet i keqardhur për ngjarjet e shëmtuara të ndodhura sot në sallën e seancave plenare nga deputetët e Partisë Demokratike. Të gjithë shqiptarët e panë se si fajtorët për keqqeverisjen 8 – vjeçare të Shqipërisë dhe shqiptarëve bllokuan punimet normale të Parlamentit me të gjitha mjetet jo ligjore dhe aspak parlamentare, madje duke përdorur hedhje të sendeve apo vezëve në drejtim të Kryeministrit Edi Rama dhe kabinetit qeveritar.

Prandaj, bazuar në nenin 65 të Rregullores së Kuvendit, Grupi Parlamentar i PS i ka kërkuar Kryetarit të Kuvendit të mbledhë urgjentisht Byronë e Kuvendit, për të shqyrtuar kërkesën për përjashtim nga punimet e Kuvendit në seancë plenare dhe në komisione deri në 10 ditë për deputetët e Grupit Parlamentar të Partisë Demokratike: ­

Albina Dede ­

Bedri Hoxha

Genti Strazimiri

Këta deputetë, në mënyrë të paprecedentë kanë qëlluar me vezë Kryeministrin dhe anëtarët e Këshillit të Ministrave si dhe kanë përdorur fjalë fyese, jo etike, shumë të rënda dhe aspak të denja për fjalorin parlamentar ndaj tyre.

Kjo sjellje e padenjë, shoqëruar edhe nga anëtarë të tjerë të Grupit Parlamentar të Partisë Demokratike, ka shkaktuar rrëmujë dhe kaos në mjediset e sallës plenare duke penguar zhvillimin e rregullt të seancës plenare.

Grupi i PS kërkon që ndaj këtyre deputetëve të zbatohet masa disiplinore e parashikuar në nenin 63, shkronja „ç” të Rregullores së Kuvendit. /tvklan.al