Ish-ministri i Rendit Publik, Perikli Teta ka qenë një prej figurave politike të ftuar në emisionin “E diela debat” drejtuar nga Blendi Fevziu.

Gjatë emisionit, ish-ministri tregoi se si e mori vesh lajmin për vrasjen e Azem Hajdarit, një nga vrasjet më të rënda në sferën politike të ndodhura në Shqipëri. Përmes intervistës, ai hedh dritë mbi ngjarjen dhe tregon vështirësitë si ministër i Rendit Publik.

INTERVISTA E PLOTË E PERIKLI TETËS

Blendi Fevziu: Të nderuar teleshikues mirmbrëma. Ju flas nga studio e Tv Klan në emisionin “E diela debat”. Ashtu siç e keni ndjekur nga anonçimet e ditëve të fundit, duke filluar nga e enjtja, i ftuari i sotëm do të jetë ish-ministri i Rendit Publik, Perikli Teta. Një nga figurat e njohura, protagonistët e politikës shqiptare që nga viti 1991 e deri më sot. Ish-ministër i Mbrojtjes, ish-Sekretar Shteti për Politikat e Mbrojtjes, ish-ministër i Rendit Publik, aktualisht anëtar i presidencës së Partisë Aleanca Demokratike dhe ish-deputet në dy legjislatura. Zoti Teta ka ardhur sot për të diskutuar mbi të fshehtat ose misteret e 14 Shtatorit dhe ngjarjeve pas kësaj date. Ky është një emision i shtyrë, unë kisha planifikuar ta ftoja Zotin Teta në Televizionin Shqiptar në emisionin që drejtoja atëherë atje që në datën 20 Shtator të këtij viti, menjëherë pas vrasjes së Zotit Hajdari. Emisioni nuk u realizua dot, megjithatë me pak vonesë Zoti Teta është i pranishëm në emision për herë të tretë, pra ka qenë i ftuar edhe dy herë të tjera në emisionin e dytë të këtij cikli. Unë e falenderoj edhe një herë Zotin Teta për pjesëmarrjen dhe besoj se nuk kemi më përse humbim kohë. Do të ishte më normale që të fillonim nga ngjarje pak më paraprirëse të 14 Shtatorit, por unë kam bërë një përzierje të pyetjeve, besoj kështu do të ndihmoj më shumë dhe do të jenë më të interesuar teleshikuesit që të mësojnë diçka. Përpara se të fillojmë do doja t’iu pyesja se përse vendosët të vinit tani në këtë emision dhe jo dy muaj më parë, kur ngjarjet ishin më të nxehta dhe mundësitë e konkluzioneve ishin më të afërta?

Perikli Teta: Vendi ynë është një vend me shumë probleme. Shqipëria do të thosha është një i sëmurë rëndë. Sëmundjet janë të shumta, si në lloje dhe në sasi dhe sëmundja kryesore lidhet me defektet që ne kemi për ndërtimin e shtetit. Patjetër që këto defekte kanë mikrobin e tyre dhe mikrobet janë politikanët e sotëm shqiptarë, impotenca jonë për ndërtimin e shtetit. Mund edhe të parashtrojmë argumente për t’u shfajësuar. Kemi qenë nën influencën bizantine, më pas, pas shekullit të XIV-XV për 400 apo 500 vjet direkt ose indirekt kemi qenë nën influencën turke, kështu që ndërpremë lidhjet për zhvillim me Europën Perëndimore. Më pas na u dha mundësia në shekullin e XIX për të bërë shtet, nuk ndërtuam dot shtet. Erdhi periudha e komunizmit për 45 vjet ndërtuam një pseudoshtet. Në shekullin e XIX, ashtu siç thotë me të drejtë një studiues i huaj, ne nuk bëmë dot shtet se nuk kishin aristokraci, nuk kishim borgjezi. Ajo ose ishte e masakruar ose e korruptuar, ose ishte e islamizuar. Ne me të drejtë mund të themi se ishim të tillë, ishim nga ata siç thotë doktor Adhamudhi, që alfabetin e donim latin, por me një kusht që të lexohej nga e djathta në të majtë. Edhe pas vitit ‘90, ne me të drejtë përmbysëm sistemin komunist, u përpoqëm të ndërtojmë shtet, nuk mund të pretendojmë se nuk kemi bërë gabime, por e meta jonë konsiston në atë që ne politikanët shqiptarë nuk mund të ulemi dhe të bëjmë analizën e gabimeve. Ne nuk bëmë dot analizën e korrupsionit. Ne si opozitë folëm 6 vjet për korrupsion në qeverisjen që kaloi dhe tani që kemi 1 vit e gjysmë në pushtet nuk nxorrëm asnjë fakt. Ne nuk argumentuam dot logjikisht dhe shkencërisht se çfarë ndodhi vitin e kaluar Janar-Mars dhe kam frikë se nuk do të logjikojmë dot ngjarjet e 14 Shtatorit.

Blendi Fevziu: Megjithatë ju sapo thatë se kemi defekte në ndërtimin e shtetit. A e konsideroni edhe veten pjesë të këtij defekti duke qenë një politikan i lartë?

Perikli Teta: Patjetër. Kjo është edhe arsyeja përse nuk erdha një javë pasi më thirrët. Është e vërtetë, ju më bëtë ftesë për të ardhur. Sepse parashikoja ndryshime të situatës, parashikoja shumë ngjarje pas 14 Shtatorit dhe ashtu ndodhi. U formua qeveria e re, u mbajt programi i saj, u recituan shumë këngë. Çdo qeverisje e re e shikon atë të mëparshmen pak si mbrapsht, pa menduar që do të ketë edhe kjo këtë fat. Unë mendoj se pikërisht tani është koha me e qetë për të bërë një analizë reale. Kjo është arsyeja pse kam ardhur me kënaqësi sot.

Blendi Fevziu: Ndër pikëpyetjet e mëdha që ju përmendët ku përfshihet edhe korrupsioni, moszbardhja e ngjarjeve Janar-Mars për të cilat ne sëbashku kemi bërë një debat në praninë e ish-ministrit të Mbrojtjes, Zotit Zhulali, ju renditët edhe ngjarjet ose zhvillimet e 14 Shtatorit. Megjithatë këto zhvillime vijnë nga një akt mjaft i rëndë, siç ishte vrasja e Azem Hajdarit, një prej drejtuesve të lartë të PD dhe ish-lider i Lëvizjes Studentore për ndryshimet demokratike në Shqipëri dhe ishte rasti i parë që një deputet vritej në një atentat që unë do ta konsideroja politik, përpara selisë së partisë së tij, në një pritë. Dua të zbardh diçka, aq sa mund të zbardhet. Zoti Teta ju keni qenë ministër i Rendit, kur e mësuat vrasjen e Azem Hajdarit dhe si reaguat pas kësaj?

Perikli Teta: Vrasja e Azem Hajdarit është ngjarja më e rëndë në politikën shqiptare pas periudhës së ‘90. Është një krim tepër i rëndë dhe është një detyrë për shtetin shqiptar dhe për politikën shqiptare që të kontribuojë për zbardhjen e saj domosdoshmërisht. Atë të shtunë unë kam qenë në shtëpi, pasdite dhe rreth orës 9 e 20 jam njoftuar se para selisë së PD, deputetit Azem Hajdari i është bërë atentat dhe është qëlluar bashkë me dy shoqërues të tjerë dhe është dërguar në Spitalin Ushtarak. Iu thashë që po nisem për në zyrë dhe të më sqarojë spitali Ushtarak gjendjen e tij reale. Rrugës pa mbërritur në zyrë më thanë që deputeti Hajdari vdiq, gjithashtu edhe shoqëruesi i tij. Ndërkohë shoqëruesi tjetër ishte në gjendje të rëndë, por pa rrezik për jetën. Sapo shkova në zyrë gjeta edhe ekipin tim, shtabin e atëhershëm, biseduam për këtë ngjarje, për marrjen e masave të nevojshme. U lidhëm me kryeministrin, më dha edhe ai porositë për forcimin e gatishmërisë, për forcimin e kontrollit për kapjen nëse mundej të autorëve të kontrollit dhe një sërë porosishë që jepen në këto rrethana. Pas kësaj u lidha me PD, me qëllim për t’i kërkuar asaj bashkëpunim për zbardhjen e çështjes. Më doli në telefon një grua që edhe sot nuk e kam sqaruar se cila është, me një fjalor tepër të ashpër më mbylli telefonin. Megjithatë vazhdova punën me njerëzit e mi, sqaruam situatën si ndodhi me aq sa mundëm të sqaronim dhe paraprakisht kishim vetëm këto të dhëna: Që një punonjës policie i Komisariatit Numër 1, pranë kinema Partizanit njoftoi qendrën operative se ka dëgjuar të shtëna rreth selisë së Partisë Demokratike. Patrulla vajti menjëherë në vendin e ngjarjes dhe pa tre persona të shtrirë, një prej të cilëve ishte deputeti Hajdari. Pa një automatik kallashnikov aty afër, një pistoletë, dy krëra dhe një sasi gëzhojash.

Blendi Fevziu: Polici e njohu që bëhej fjalë për deputetin Hajdari?

Perikli Teta: Patjetër. Deputeti Hajdari ishte shumë i njohur dhe shumë i dashur për gjithë policinë.

Blendi Fevziu: Po si shpjegohet që në komunikatën e Ministrisë së Rendit që u transmetua në televizion u tha që vetëm rrugës për në spital u mësua që bëhej fjalë për deputetin Hajdari.

Perikli Teta: Unë do të thosha që nuk është ashtu, por komunikata ka një stil profesional, është hartuar nga profesionistë dhe identifikimin dhe përmendjen e emrit Hajdari ia ka lënë spitalit pas konfirmimit të vdekjes dhe identifikimit. Kjo përmbajtje për një sy të pastërvitur tingëllon sikur policia nuk e ka njohur. Deri këtu policia kuptoi që kishte shumë punë përpara. Atëherë morëm masat për përforcimin e gatishmërisë, ngritëm në gatishmëri të gjithë policinë e vendit dhe ngritëm postoblloqe në të gjithë Shqipërinë, veçanërisht në Tiranë dhe në pikat hyrëse dhe dalëse. Pamë mundësitë tona financiare, se çfarë mund të vinim në dispozicion të këtij problemi dhe deklaruam se mund të vinim në dispozicion 50-100 mijë dollarë për personin që do të na jepte informata. Dhe rreth orës 23:00 dëgjuam komunikatën e PD, e cila përmendte një emër, një targë makine Vlore. I gjithë personeli i policisë dhe të gjithë drejtuesit tashmë kishin ardhur, filluam punën në të gjitha drejtimet për zbardhjen e ngjarjes. U përpoqëm të lidheshim me Tropojën, por ishte e pamundur, nuk kishte lidhje atë natë me Tropojën.

Blendi Fevziu: Më fal Zoti ministër, në një komunikatë të mëpasme është thënë që makina që mendohet se kanë qenë vrasësit ka shkuar drejt veriut.

Perikli Teta: Edhe unë e kam dëgjuar këtë, por kjo nuk është e vërtetë, nuk ka komunikatë të Ministrisë së Rendit Publik ta thotë këtë. Nëse makina do të ishte parë që shkonte drejt veriut atëherë do të ishte përcaktuar kush është vrasësi dhe do ta ndiqte. Nuk ka një gjë të tillë, nuk është e vërtetë.

Blendi Fevziu: Megjithatë ju thatë se ishin vendosur postoblloqe në dalje të Tiranës dhe brenda qytetit, a u vendosën postoblloqe në rrugën nacionale?

Perikli Teta: Në të gjitha rrugët ku janë të përcaktuara sipas një plani nga Ministria e Rendit Publik dhe specialistët ku mund të kontrollohej profesionalisht.

Blendi Fevziu: I kanë kontrolluar ato të gjitha makinat që lëviznin drejt veriut atë ditë?

Perikli Teta: Unë besoj që ato kanë kontrolluar, ndërsa për cilësinë nuk mund të them se është bërë në mënyrë absolute, si çdo gjë që nuk mund të jetë e tillë.

Blendi Fevziu: Po, edhe si vazhduan ngjarjet?

Perikli Teta: Më pas gjatë gjithë natës, pasi ishte dhënë njoftimi nga Televizioni Shqiptar, ashtu dhe nga radiot, kemi patur lidhje me të gjitha organizmat ndërkombëtare, me shumë radio, me shumë televizione, të cilët u interesuan për shkaqet dhe rrethanat e vrasjes së deputetit Hajdari. Në mëngjesin e datës 13, rreth orës 08:00 më thonë që personi që përmendte komunikata e PD, Jaho Mulosmani, shefi i rendit të Komisariatit të policisë së Tropojës, ndodhej në zyrë, në punë. Kishte folur për këtë pak më parë Drejtori i Policisë së Rendit dhe Zoti Taulant Dedja nga Tropoja.

Blendi Fevziu: Ju po atë mëngjes keni bërë një deklaratë në radion BBC, ku keni thënë se personi është në kërkim.

Perikli Teta: Me të dëgjuar komunikatën e PD, ne e konsideruam si një pistë të mundshme dhe e konsideruam në kërkim këtë person. Rreth orës 08:00 ndodhi kjo që unë ju thashë, që më thonë që Jaho Mulosmani është në komisariatin e Tropojës dhe se ka shkuar në punë që në 7 e 15. Kërkova të lidhem me Tropojën, kam biseduar me Zotin Taulant Dedja dhe më tha: E kam parë vetë dhe kam biseduar me të.

Atëherë i thashë: I thoni atij të dalë dhe të bisedojë me mua.

Pas kësaj unë kam biseduar me Sali Mulosmanin dhe ai më tha: Ngjarjen e dëgjova duke ardhur për në punë, e dëgjova tek “Zëri i Amerikës”. Çështë ajo deklaratë për në kërkim.

Më tha edhe që grupi i gatshëm i komisariatit të Tropojës pas orës 12 të natës ka qenë në shtëpinë e tij, kur u dha gadishmëria për të gjitha komisariatet. Sidoqoftë unë i thashë të qëndrojë në komisariat dhe të mos largohet nga Tropoja. Dhe ne vazhduam punën. Kuptohet që në atë moment ishte ora 09:00 e mëngjesit dhe në orën 10:00 ishte mbledhja e qeverisë. Pas kësaj, në 10 e 45 Këshilli i Ministrave u sulmua dhe rrethanat u ndryshuan.

Blendi Fevziu: Zoti Teta, disa kohë më parë, në fund të muajit Maj, ju e kishit paralajmëruar Azem Hajdarin të mos shkonte në një vizitë të planifikuar në Tropojë, sepse kishte njoftime që njerëz të UDP-së kishin ndërmend t’i bënin një atentat. Zoti Hajdari e ka deklaruar këtë edhe në emisionin tim. Normalisht kishit të dhëna të tjera që vërtetonin se Hajdarit mund t’i bënin një atentat?

Perikli Teta: Në mes të muajit Maj, Ministria e Rendit Publik ka patur një informacion që persona të paidentifikuar përgatitën të bëjnë një atentat ndaj deputetit Azem Hajdari. Kjo e dhënë ka qenë nga më shumë se një burim. Unë e mendova dhe e mora seriozisht këtë problem dhe vendosa ta njoftoj Azemin. Kjo nuk përbënte dekonspirimin e një sekreti, përkundrazi duke e njoftuar e ftoja edhe për bashkëpunim për garantimin e jetës së Azemit.

Blendi Fevziu: A mund të bënit diçka Zoti ministër për ta garantuar jetën e tij? Kur e dinit që një deputet ishte i kërcënuar, a mund të merrnit masa për ta mbrojtur?

Perikli Teta: Dëgjo, të nesërmen e kësaj dite Azemi më mori në telefon për një problem tjetër. Për një person që e kishte kapur policia dhe Azemi më tha se është i pafajshëm dhe ai rezultoi vërtetë i pafajshëm. I thashë më mer në telefon pas 10 minutash dhe kur më mori i thashë nuk do të lëvizësh nga Tirana pa më informuar mua dhe policinë. Ne do të jemi gjithmonë pranë teje. Ai më tha: Detyra jote është të më ruash mua, deputetin, kryetarin e këshillit dhe unë do të lëviz për kryerjen e detyrave të mia. Në 2 Qershor e kam takuar në darkë në Ambasadën Italiane dhe më tha që do të shkonte të nesërmen në Tropojë. I kam thënë të mos shkojë. I thashë që nesër do të vij edhe unë në Tropojë, të mos shkojë në asnjë mënyrë sepse nuk garantojmë dot udhëtimin. Megjithatë ai më tha do të shkoj dhe shkoi. I kam nxjerrë drejtorin e policisë së Shkodrës në Koman me një grup të Forcave të Ndërhyrjes së Shpejtë. Ai i tha që të kthehej, sepse Ministri i Rendit nuk mund të të garantojë vizitën në Tropojë. I thoni ministrit që detyra e tij është të më garantojë jetën dhe vazhdoi rrugën për në Tropojë. Unë shkova në Tropojë, bisedova me shefin e komisariatit në prani të disa ministrave, edhe ata në komisariat ishin shumë të shqetësuar për garantimin e jetës së Azem Hajdarit. Dhe po atë ditë ndodhi ajo që ndodhi, që atij i bënë një atentat në trup dhe fatmirësisht ai shpëtoi. 107 gëzhoja në vendin e ngjarjes. Përsëri iu shmag policisë, nuk i tha se ku do të shkonte. Azemi siç duket nuk kishte besim tek policia dhe këtë ma shprehte gjithmonë, nga atentatet ndoshta dhe nga peripecitë që kishte kaluar e konsideronte frikën të tejkaluar dhe ne nuk mundëm ta mbrojmë dhe t’i garantonim jetën, sepse edhe atë ditë ne për shumë orë nuk e morëm vesh ku ishte.

Blendi Fevziu: Megjithatë Zoti Teta si mund të quhet një shtet i cili mund të deklarojë se nuk mund të garantojë udhëtimin e një deputeti për të mos bërë më fjalë për një shtetas të thjeshtë. A është normale kjo? Dhe a është normale që pasi qëllohet një deputet dhe 107 gëzhoja gjenden në vendin e ngjarjes të mos bëhet asnjë hetim dhe të mos dalë asnjë emër konkret që të mbajë përgjegjësi për këtë?

Perikli Teta: Patjetër që hetimi është bërë dhe patjetër që hetimet vazhdojnë dhe unë shpresoj që një ditë kjo ngjarje do të zbardhet. Ajo që kërkon kjo ngjarje është që pushtetarët dhe ish-pushtetarët të vihen në dispozicion të policisë, të shkojmë tek ajo dhe në fund të fundit do të ballafaqohemi me dy nene të Kodit Penal. Dëshmia e rreme dënohet dhe mostregimi dënohet gjithashtu. Nuk mund të ketë politikan në botë që të mos shkojë para organeve të drejtësisë. Çdo thirrjeje duhet t’i përgjigjemi dhe të shkojmë atje. Unë e kuptoj që legjislacioni ka edhe klauzola që edhe mund të heshtësh, por në këtë rast në asnjë mënyrë. Nëse duam ta zbardhim duhet të rrimë tek shkallët e organeve të drejtësisë dhe të dëshmojmë për gjithçka që dimë dhe gjithçka që na kërkohet dhe të mos fajësojmë shtetin ose institucione të veçanta për moszgjidhjen e këtij problemi.

Blendi Fevziu: Zoti Teta a prisnit trazira pas vrasjes së Azem Hajdarit?

Perikli Teta: Unë patjetër që prisja trazira, e kisha shumë të qartë situatën. Duke parë ngjarjen pas 22 Gushtit. Çfarë ndodhi në harkun e 12 ditëve, parashikoja trazira të mëdha. Për 10-12 ditë u bënë 22 vrasje pas 22 Gushtit, u bënë 15 vjedhje, 6 vjedhje me armë, 14 mitingje. Policia në gjithë Shqipërinë fyhej dhe shahej. Ka 5 raste të bllokimit të rrugëve dhe për t’i vënë kapak këtyre në fund pati një sulm nga Partia Socialiste kundër policisë dhe Ministrisë së Rendit. Dhe një sulm të paskrupullt nga gazeta “Zëri i Popullit” kundër policisë dhe Ministrisë së Rendit Publik.

Blendi Fevziu: Meqenëse dolëm tek problemi i të gjatëve, ju në çfarë ore e keni marë urdhërin për arrestimin e 6 ish-funksionarëve të lartë të shtetit dhe ish-ushtarakëve me datën 22 Gusht?

Perikli Teta: Unë atë ditë nuk kam qenë në Tiranë, kam qenë në Shkodër dhe jam kthyer në orën 5 pasdite. Me të ardhur në zyrë vartësit e mi më kanë treguar urdhërat për arrestimin e të gjateve. Ata i kishin marë rreth drekës.

Blendi Fevziu: A e vutë në dijeni kryeministrin?

Perikli Teta: Kryeministri nuk ishte në Shqipëri, ishte në Maqedoni.

Blendi Fevziu: Nuk keni kontaktuar me të për një arrestim të një përmase të tillë?

Perikli Teta: As nuk e kam menduar që duhet të kontaktoja me të. Unë i di detyrat e policisë, di edhe detyrat e organeve të drejtësisë dhe policia duhet të zbatonte urdhërin.

Blendi Fevziu: Po me Prokurorinë a kontaktuat?

Perikli Teta: Kontakti me Prokurorinë ishte ky: Leximi i atyre urdhrave, i ballafaqova me legjislacionin në fuqi dhe m’u dukën të rregullta.

Blendi Fevziu: Ju mendoni që ky hap ishte i drejtë politikish, jo juridikisht?

Perikli Teta: Mua më vjen keq që kjo u politizua shumë dhe duhej t’i lihej organeve të drejtësisë. Në jetë ka ngjarje të tilla që mund të rëndojnë politikisht, por organet e drejtësisë nuk janë funksione të organeve politike. Unë besoj që tashmë ka kaluar ajo kohë, ka kaluar koha e Enverit që kur flitej për drejtësinë shkruhej “ligji mishëron vijën e partisë”. Unë e konsideroj normale, jam për shtet, drejtësia është e ndarë dhe nuk ka të bëjë fare me këto. Ajo të mbajë përgjegjësinë dhe të zgjidhë problemet e saj.

Blendi Fevziu: Pak më parë ju thatë që prisnit trazira dhe zhvillime në momentin që mësuat vrasjen e Zotit Hajdari dhe deri në momentet që do të bëhej varrimi i tij. Si shpjegohet atëherë që të nesërmen në mëngjes, më 13 Shtator, ju nuk kishit marë masa për të mbrojtur selinë e Kryeministrisë, madje edhe të Ministrisë së Rendit, që u sulmua nga një grup protestuesish, që atë ditë nuk ka qenë i armatosur. A duhet të lejoheshin institucionet shtetërore të sulmoheshin apo të digjeshin?

Perikli Teta: Kuptohet që askush nuk mund të thotë që duhet të lejohen institucionet shtetërore të dhunohen apo të digjen. Asnjë shtet që pretendon të jetë shtet nuk mund të pranojë që shteti të sulmohet me gurë, shteti të sulmohet me armë nga këta njerëz që e fillojnë luftën si Aleksandri i Maqedonisë me armë dhe e përfundojnë duke vjedhur qilima, kolltuqe apo sende të tjera nëpër zyra. Shteti është shtet dhe duhet të jetë i ashpër, i prerë në zbatimin e ligjit dhe nuk është shteti i kartagjenës ku luftohet me gurë. Unë thashë që në datën 12 u morën një sërë masash për vendosjen e gatishmërisë, por këto janë mësime, janë konkluzione që të gjitha organizmat shtetërore duhet t’i studiojnë me vëmendje, sepse më datën 13 në mëngjes një grup njerëzish, civila, kalojnë, afrohen pranë ministrisë, nxjerrin automatikët dhe godasin të gjitha makinat në oborr dhe dritaret e zyrës së ministrit. Askush nuk mund të mendojë që këta njerëz që janë të predispozuar dhe të deklaruar për të bërë një ceremoni mortore do të nxjerrin nga poshtë xhaketës mitrolozët dhe do të sulmonin shtetin.

Blendi Fevziu: Kjo ndodhi të dielën, në datë 13. Ju kishit kohë 24 orë të reflektonit. Kryeministri, Zoti Nano bëri një deklaratë në orët e vona të së dielës ku deklaroi se kjo nuk do të ndodhë më dhe se autoriteti i shtetit do të jetë në vendin e tij dhe do të reagojë me ashpërsi ndaj atyre që do të duan të shkelin ligjin. Dhe në fakt të nesërmen sulmi qe me përmasa shumë më të mëdha. Përderisa deklaruat se do t’i mbronit institucione shtetërore, nuk mund të bënit këtë? Është e pashembullt që një shtet brenda 20 minutave, Këshilli i Ministrave, parlamenti, selitë e 4-5 ministrive bien njëra pas tjetërës, përfshirë këtu edhe një nga institucionet më të rëndësishme siç është televizioni.

Perikli Teta: Kjo patjetër ka shpjegimet e veta. Unë do të thosha që të gjitha institucionet u ndodhën para një grushti shteti dhe kur bëhet grusht shteti ka disa rregulla sipas të cilit duhet të veprosh. Nuk mund të mendosh që shqiptarët shfrytëzojnë një ceremoni mortore për të dhunuar shtetin.

Blendi Fevziu: Ju mendoni se ishte grusht shteti Zoti Teta?

Perikli Teta: Unë mund t’ju them që unë jam i pari që e kam përdorur termin grusht shteti dhe mund t’ju them se ky grusht shteti ka tiparet më klasike të grushtit të shtetit. Nëse do t’i duhej dikujt një shembull për grusht shteti mund të shërbejë 14 Shtatori. Grusht shteti do të thotë një organizim i befasishëm për marrjen e institucioneve të rëndësishme shtetërore me dhunë. Dhe pas kësaj shpallja e aksionit të përfunduar dhe marja e pushtetit. E tëra kjo ka këto karakteristika: Befasinë, mashtrimin, bashkëpunimin dhe tentativën për t’u përhapur në të gjithë territorin. Cila ishte befasia? Befasia ishte një grup njerëzish që mbajnë arkivolin e një njeriu të dashur të tyre dhe nxjerrin armët dhe sulmojnë shtetin.

Blendi Fevziu: Përse institucionet shtetërore qenë lënë pa mbrojtje, për shembull televizioni?

Perikli Teta: Televizioni nuk hyn tek objektet që ruhen nga garda, por nga policia, objektet e tjera kishin aq roje sa ishin mundësitë.

Blendi Fevziu: A kishin urdhër trupat e gardës, ato speciale dhe të policisë që të qëllonin?

Perikli Teta: Këtu nuk është problem urdhri. U bënë shumë herë që shtrohet i njëjti problem. Ushtarakët tanë dhe rinia jonë nuk kanë një koncept të saktë për ligjin dhe nuk kanë akoma besimin e duhur tek shteti. Nuk mund të ketë një polic apo një ushtar besim tek shteti, kur ministrat e këtij shteti delendisen nga mëngjesi deri në darkë si vjedhës, si të korruptuar nga të gjitha krahët. Atëherë ata nuk do të kenë më besim dhe nuk do të sakrifikojnë.

Blendi Fevziu: Pse dolën tanke? Tanket sa herë kanë dalë është një praktikë që vjen nga viti 1991 e këtej, që sa herë dalin, hipin njerëzit mbi tytat e tankeve dhe tundin këmbët atje. Kësaj here përse i nxorrët?

Perikli Teta: Unë kam të njëjtin mendim që ke edhe ti për tanket. Çdo armë që nxirret nga brezi po nuk qëlloi është pa vlerë. Kësaj radhe tanket kanë dalë me një mision të caktuar, kanë dalë për evakuimin e të plagosurve. Duhet të keni parasysh që me 13 dhe 14 nuk janë mbrojtur institucionet, janë bërë nga djemtë e Gardës dhe të Policisë përpjekjet maksimale për mbrojtjen e saj dhe janë plagosur 15 vetë nga Garda, tre prej të cilëve shumë rëndë. Është plagosur Komandanti i Gardës, Zv/Komandanti. ose të them që me 13 dhe 14 janë plagosur gjithsej 57 vetë dhe kanë vdekur 5 veta. Nuk duhet mohuar që mesa kanë mundur e kanë bërë detyrën.

Blendi Fevziu: Zoti Teta, mëngjesin e 14 Shtatorit rreth orës 11:00 ju i keni kërkuar drejtuesve tuaj dorëheqjen? Është e vërtetë?

Perikli Teta: Ju më pyetët a parashikonit trazira pas vrasjes së Azemit. Rrugës duke shkuar për në zyrë pas vrasjes së Azemit e kam menduar dhe e vendosa se çfarë duhet të bëja. Gjëja e parë ishte të jepja dorëheqjen. Këtë duhet ta bëja jo se ndodhi vrasja, jo se Shqipëria hyn tek ato vende ku duhet të japësh dorëheqjen si Belgjika, Shqipëria hyn te Izraeli, çdo ditë hidhen në erë autobusë me kalamaj dhe gra dhe asnjëherë nuk kemi dëgjuar që ministri të japë dorëheqjen. Shqipëria nuk hyn tek ato vende ku çdo ministër duhet të jetë i ndërgjegjësuar për të dhënë dorëheqjen, por unë e vendosa për arsye të tjera. Kisha parasysh çrregullimet që ndodhën në Shqipëri për 20 ditë, çrregullimet do të ishin më të mëdha dhe qeveria, parlamenti nuk ishin nga ata që të kishin këllqe që të mbronin sulmin e opozitës dhe të mbronin pushtetarët e saj. I gjithë faji do t’i hidhej Ministrisë së Rendit, policisë dhe ministrit. Prandaj për të çliruar policinë unë kisha vendosur të jepja dorëheqjen. Do ta bëja më datë 13. Mbledhja filloi në orën 10-të, deri në 10:45 foli kryeministri, pastaj m’u dha fjala mua. Sa fillova të flas u sulmua godina dhe copat e xhamave filluan të na bijnë ne. U ndërpre mbledhja.

Blendi Fevziu: Në rrëmujë të plotë mesa mbaj mend unë.

Perikli Teta: Dëgjo, ka shumë probleme dhe duhen bërë shumë analiza.

Blendi Fevziu: Unë kam qenë në hotel Rogner dhe pashë ministrat që iknin kush me makina të rastit dhe kush në këmbë.

Perikli Teta: Këto janë mangësi organizative që nuk i falen një shteti. Ju pyetët më parë a i falet kjo një shteti. Po ky është shteti, është shkatërruar për 8 vjet dhe nuk mund të bëhet për 1 muaj apo për 5 muaj, duhet kohë. Faktorin kohë askush nuk mund ta neglizhojë. Kur binin copat e xhamit në mbledhje, askush nuk ishte në gjendje të thoshte ku duhet të shkojmë.

Blendi Fevziu: Me gjithë eskortat e mëdha të shoqëruesve.

Perikli Teta: Me gjithë shoqëruesit që të përplasesh nëpër koridore me ta dhe ata nuk dinin çfarë të bënin. Unë dola jashtë dhe gjëja e parë që pashë ishte makina ime që digjej. Ka shumë punë që duhen bërë, nuk bëhen menjëherë të gjitha, duhet koha e nevojshme. Me 13 u larguam si mundëm. Pashë djem të Gardës që nuk lëviznin dhe qeveritarë që iknin. Më 14 kam marë Neritan Cekën në telefon, siç e ka pohuar edhe ai, dhe i kam thënë do jap dorëheqjen. Ai më tha në asnjë mënyrë, qëndro aty. Pas asaj që ndodhi në datën 14 ishte jo e ndershme nga ana ime të jepja dorëheqjen, sepse ishte rruga më e lehtë për mua dhe mundësia më komode të fshihesha, të ikja në shtëpi dhe të dilja pa lagur. Unë nuk mund ta bëj këtë. Kështu që anulova dorëheqjen dhe qëndrova deri në fund.

Blendi Fevziu: Pyetja tjetër ka të bëjë me marrëdhënien që ke patur me kryeministrin gjatë datës 14 Shtator. A keni kontaktuar pasdite me kryeministrin dhe a kishit dijeni se ku ndodhej?

Perikli Teta: Unë nuk mendoj se kam patur probleme delikate gjatë gjithë periudhës që kam qenë në detyrën e ministrit. Marrëdhëniet e mia kanë qenë korrekte, konform ligjit dhe nuk i kam borxh asnjërit prej tyre. Pas 13 Shtatorit nuk kam patur lidhje me asnjërin, nuk ka patur shtet, shteti ka qenë Ministria e Rendit Publik dhe këtë duhet ta pranojnë të gjithë.

Blendi Fevziu: A kishit dijeni se ku ndodhej kryeministri?

Perikli Teta: Nuk kisha dijeni, asnjë telefon nuk tingëllinte në godinën e Këshillit të Ministrave, prandaj kjo ishte arsyeja se përse gjithë barra i mbetej Ministrisë së Rendit Publik, ajo u mobilizua dhe bëri atë që me 20 apo 21 Shtator në takimin Prodi-Clinton ku u tha që policia shqiptare ka funksionuar si një forcë e vërtetë dhe në mbështetje të shtetit.

Blendi Fevziu: Më pas e mësuat se ku ndodhej kryeministri?

Perikli Teta: As nuk jam interesuar.

Blendi Fevziu: Të henën rreth orën 1-2 pasdite u duk se shteti mori fund, në rrugë dolën banda që plaçkisnin, thyenin, vidhnin. Përse nuk u larguat edhe ju si kryeministri apo disa ministra, vetë thatë që shteti mori fund. A e menduat edhe ju ikjen?

Perikli Teta: Unë thashë që u duk se shteti mori fund, por nuk mori fund sepse edhe nëse mbetet një anije, luftën mund ta fitosh dhe kjo anije ishte Ministria e Rendit Publik, e cila gabimisht tani po goditet dhe po fyhet, duke u konsideruar si e korruptuar dhe kondrabandiste. Unë besoj se nuk është ky realiteti.

Blendi Fevziu: Ju keni vërejtje për emërimet e reja në Ministrinë e Rendit?

Perikli Teta: Patjetër që kam vërejtje, nëse janë ashtu siç i kam dëgjuar në shtyp dhe në televizion. Duhet të them që unë jam nga ata që dua që qeveria Majko të ketë sukses dhe pavarësisht pozicionit im do të bëj çështë e mundur që të ketë sukses, sepse kjo është në të mirën e Shqipërisë. Është e papranueshme dhe tregon përgatitje të dobët të forcave politike që për 14 muaj të ndërrosh 3 kabinete qeveritare.

Blendi Fevziu: A është ky një dështim në qeverisje Zoti Teta?

Perikli Teta: Jo do të thosha, nëse dështon edhe kjo, atëherë do të jetë një dështim i plotë. Prandaj jam në mbështetje të kësaj. Lidhur me emërimet ato janë e drejtë e padiskutueshme e ministrit të Rendit Publik, por kam vënë re diçka, pas datës 14 unë kam bërë disa ndryshime duke parë pikat e dobëta të atyre ditëve. Në emërimet që ishin në miklaturën e Këshillit të Ministrave njëri nuk m’u pranua. Shkova për të biseduar me kryeministrin, nuk e gjeta aty, por gjeta disa të tjerë dhe iu thash përse nuk është miratuar ky ndryshim? Ata më propozuan një person tjetër dhe unë iu thash që nuk mund ta vë atë sepse ai ka shkelur rregullat, urdhërat e ministrit, ka shkelur udhëzimet e Ministrisë së Rendit dhe si rezultat i këtyre shkeljeve ka vrarë një njeri, ka vrarë shokun e vet me makinë. Unë kam shënuar që ai të jepet për ndjekie penale dhe nuk mund të ngrihet në përgjegjësi tani. Kjo është keqardhja ime, që emërimet nuk u filluan nga qeveria Majko, por nga qeveria e mëparshme.

Blendi Fevziu: A ka implikime të shtetit me bandat kriminale dhe mafioze? A iu ka rezultuar ju gjatë kohës që keni qenë ministër të personave të veçantë, jo në raport institucional.

Perikli Teta: Unë nuk kam informacione të tilla. Duhet të dimë një gjë, ne jemi vendi i thashethemeve dhe prodhojmë thashetheme në mënyrë të pallogaritshme. Ne jemi 3 milionë kundër 3 milionëve. Dhe për të gjithë nga ne ka patjetër fjalë që është kondrabandist, hajdut, meret me banda etj. Mua nuk më rezulton sepse do të të thoja. Lidhur me emërimet mua më vjen keq dhe patjetër do të bisedoj me Cekën për të shfrytëzuar cilësinë e tij si kryetar i Komisionit të Rendit për të vënë para përgjegjësisë Partinë Aleanca Demokratike, për të luftuar kundër kësaj, sepse vë re që po ristrukturohen grupet e kondrabandës. Pra ato degë që ne u munduam t’i presim brenda 5 muajve, ato po ringjiten.

Blendi Fevziu: Ky është një paralajmërim mjaft serioz Zoti Teta.

Perikli Teta: Patjetër, ajo që më skandalizon është lajmi i sotëm i televizionit dhe i shtypit, nëse është i vërtetë, që ka patur kontradikta mes ministrit dhe kryeministrit për emërimin e zv. ministrit. Është e papranueshme për mua që t’i imponohet ministrit të Rendit, zv/ministri i Rendit, duhet të propozohet nga vetë ministri. Nëse nuk pranohet nga qeveria, ai duhet të vazhdojë me propozime të tjera. Por t’ia imponosh unë këtë nuk e kuptoj.

Blendi Fevziu: Keni kontaktuar me Zotin Petro Koçi, me ministrin aktual?

Perikli Teta: Unë nuk kam kontaktuar me të dhe ndoshta është një nga lajthitjet e mia, megjithëse është e lidhur edhe me një mëri timen të vogël me drejtuesit e PS. Unë kisha ndërmend që të bëja një ceremoni ndarjeje, të thërrisja televizionin dhe të mos ndahesha ashtu siç ndahemi ne kur i lirojmë karrigen njëri-tjetrit duke kthyer kokën anash. Por t’i jepja dorën, të dilnim bashkë deri në oborr dhe unë të ikja në shtëpi. U çudita kur dekreti ka dalë në orën 2 dhe nga ora 6 më mer një drejtues dhe më thotë: Të kërkova, por nuk të gjeta, e bëra prezantimin e Petro Koçit. Dhe unë i thash: Derisa më gjete tani mund të më gjeje edhe para prezantimit.

Nuk e zgjata, por më erdhi keq. Nuk më vjen mirë që nuk e kam takuar, por do ta takoj patjetër.

Blendi Fevziu: Rikthehemi tek data 14 Shtator për të zbardhur aq sa mund të zbardhim. Zoti Berisha ka thënë në një konferencë shtypi të ditëve pasuese se ju i keni telefonuar disa herë për t’i kërkuar ndihmë, ose për të rënë dakord me të që të mos sulmohej Ministria e Rendit. A është e vërtetë kjo?

Perikli Teta: Është e vërtetë që unë kam biseduar me Berishën, kam biseduar edhe me persona të tjerë të PD, por nuk e di se çfarë do të thotë Zoti Berisha me këtë, që unë i kam kërkuar ndihmë atij. Ajo që i kam kërkuar unë Berishës dhe anëtarëve të tjerë të PD është kjo: Të heqin tanket dhe t’ia dorëzojnë Gardës. I kam dërguar letër me shkrim që të dorëzojnë armët nëse ka brenda PD dhe të lirohet Radio Televizioni Shqiptar. Kjo nuk është ndihmë që më jepet mua, kjo është ndihmë për Zotin Berisha, është ndihmë për PD, është ndihmë për Shqipërinë dhe ndihmë për të gjithë.

Blendi Fevziu: Dhe si ka reaguar Zoti Berisha?

Perikli Teta: Unë nuk mund ta akuzoj Zotin Berisha si organizator i të gjitha atyre, por ajo që mund të them është që ai nuk ndali dot grushtin e shtetit dhe dhunimin e institucioneve shtetërore. Unë mendoj se autoriteti i tij duhet ta bënte patjetër. Ajo që mund të them është se ai duhet ta ndalte, por nuk e ndali dot këtë grusht shteti.

Blendi Fevziu: Në datën 14 pasdite situata ishte stabilizuar, por dy tanke vijonin të qëndronin përpara selisë së PD me njërëz të armatosur mbi to, dorëzimi i tyre u bë të nesërmen. A ju duket normale? A mund të merte masa shteti që atë ditë për të stabilizuar deri në fund situatën?

Perikli Teta: Ju thashë që ato tanke dolën për të evakuuar të plagosurit. Djemtë e Gardës nuk tërhiqnin dot shokët e plagosur, sepse nuk i linin ata banditët që sulmonin. Atëherë u mendua që të dalin 7 tanke dhe u kthyen tre. Tanku i parë që ecte ngadalë u dorëzua sepse hipën mbi të, erdhën deri në qendër dhe qëlluan në drejtim të zyrave, u kënaqën të gjithë ata që qëllonin dhe që ishin mbi tank. Kjo ishte një ditë shumë e zymtë. Për dy tanke policia dhe shtabi im diskutuam gjatë, por ata kishin armë brenda dhe mund të dëmtonin zonën përreth dhe ne u munduam që ata të liroheshin pa u goditur.

Blendi Fevziu: Si shpjegohet Zoti Teta që këto tanke dolën për marjen e të plagosurve dhe dolën me tyta të mbuluara me kapuç dhe brenda kishin arsenal të madh armësh.

Perikli Teta: Kjo është e lidhur me atë që ju thashë, që mungesa e organizimit dhe ata që dolën mendonin se do të mernin vetëm shokët dhe jo për të luftuar. Është një mungesë përvoje, por ka edhe të meta të tjera. Ka shumë probleme që duhen zgjidhur dhe që duhen parë drejt në sy.

Blendi Fevziu: Zoti Teta me kë biseduat për lirimin e televizionit?

Perikli Teta: Unë kam biseduar me drejtues të organizmave ndërkombëtare. Ishte shumë e shëmtuar që në televizionin kombëtar lexoheshin përralla që qeveria ra. Kam vendosur dhe jam përkrahur nga shtabi që nese nuk do të lirohej deri në orën 7, do ta mernim me dhunë.

Blendi Fevziu: Por kjo do të sillte edhe dëmtimin e tij.

Perikli Teta: Në raste të tilla duhet të parashikosh edhe dëmtime. Por u arrit që u morëm vesh dhe ata u liruan.

Blendi Fevziu: Zoti Teta më 15 Shtator në mëngjes dhe në vazhdim, ju ishit një nga personazhet që qetë në qendër të mediave dhe shoqërisë shqiptare pas deklaratës që bëtë në televizion, ku deklaruat se ishit larë, ishit rruajtur atë ditë për të vdekur në zyrën tuaj. Ishte një deklaratë mjaft e fortë dhe ju qetë i pari që i deklaroi Shqipërisë se ishte stabilizuar dhe ishte në kontrollin e rendit. Si shpjegohet që pa u mbushur dy javë nga kjo deklaratë që ju ishit nga personazhet më popullorë, ju u larguat nga detyra e ministrit. Desha të di thjeshtë pse u larguat? Ato ditë keni qenë një nga të paktët ministra në detyrën e tij dhe nga të paktët ministra që mbajtët në dorë shtetin. Pse u larguat?

Perikli Teta: Ka dy gjëra që nuk duhen ngatërruar. Qëndrimi dhe largimi. Janë dy gjëra krejtësisht të kundërta. Qëndrimi ka të bëjë me edukatën time dhe me moralin tim, unë jam i edukuar ushtarak, për mua Shqipëria është një gjë shumë e madhe është shtet-komb. Ndërsa largimi është diçka tjetër, unë e kisha vendosur që do të largohem që me datën 12.

Blendi Fevziu: Atë ditë vërtet ishit i vendosur të vdisnit, apo ishte një shaka Zoti Teta?

Perikli Teta: Patjetër, me Shqipërinë nuk bëhet shaka.

Blendi Fevziu: Kishte një koment sipas të cilit ju do të kalonit si zv/kryeministër.

Perikli Teta: Nuk e di a e ke lexuar, është një Piters i cili ka një koment shumë të bukur se si ngrihen njerëzit në përgjegjësi. Ai thotë që njerëzit ngrihen në përgjegjësi mbi bazën e paaftësisë absolute. Domethënë, ti je ushtarak, je ministër Mbrojtje, je ministër Rendi, të çojnë ministër për Marrëdhëniet me Azinë Juglindore. Pra gjithmonë shkon atje ku nuk je specialist. Unë nuk jam nga ata që lëviz sipas Pitersit. Pastaj nëse u përkëdhela ditët e para, unë nuk kam as moshë as surrat që të lajkatohem nga këto.

Blendi Fevziu: Pse u larguat Zoti Teta?

Perikli Teta: Pse u largova jua thash, ju pyetët pse ju larguan?

Blendi Fevziu: Po.

Perikli Teta: Unë e kam thënë edhe herë të tjera, qeveria drejtohet nga kryeministri dhe parimi im ka qenë që, po pe që kryeministri nuk do të punojë më me ty, largohu.

Blendi Fevziu: Ju keni patur marrëdhënie të mira me Zotin Nano mesa di unë?

Perikli Teta: Patjetër, marrëdhëniet i kemi patur korrekte.

Blendi Fevziu: Po çfarë u thye mes jush pas 14 Shtatorit?

Perikli Teta: Unë mendoj se nuk isha njeriu i përshtatshëm për shumë njerëz aty.

Blendi Fevziu: Për çfarë arsye, përderisa kishit qenë i pranueshëm deri atë ditë.

Perikli Teta: Nuk ka rëndësi, duhet diskutuar nga 14 Shtatori e tutje. Jo deri në 14 Shtator, deri në 14 Shtator nuk kam asnjë problem. Ç’kam patur për të thënë i kam thënë të gjitha në mbledhjet e qeverisë. Pas 14 Shtatorit u krijuan gjendje të tilla dhe unë nuk mund të qëndroja më në qeveri.

Blendi Fevziu: Por sipas të dhënave që unë kam dhe më duket se janë shprehur edhe në shtyp, ditën që ju jeni larguar, ju keni bërë një deklaratë dorëheqje pasi keni rënë dakorD me kryeministrin, Zotin Nano. Madje edhe tekstin e keni shkruar në zyrën e tij. Disa orë më vonë e ndryshuat, duke e bërë shumë më të ashpër, duke akuzuar dy partitë kryesore, Partinë Socialiste dhe Partinë Aleanca Demokratike për paaftësi. Çfarë ndodhi nga kjo mesditë, kur ratë dakord me Nanon, e deri në atë pasdite në orën 19 e 30 kur deklarata juaj u transmetua në televizion?

Perikli Teta: Unë rashë dakord me Nanon sepse përputhej me gjithë mentalitetin tim dhe me të gjitha çfarë unë thash deri tani dhe dorëheqjen e shkrova aty në zyrë. Por kërkova një kusht të vetëm, i cili nuk kishte ndonjë kosto. Doja që të transmetohej menjëherë në televizion dhe radio. Arsyeja ishte sepse bëheshin pazaret dhe unë nuk desha të hy në koshin e këtij pazari dhe kërkova që të transmetohej direkt. Prita, kërkova presidentin, ai ishte i zënë dhe unë u detyrova të bëj atë deklaratë dhe, edhe pse kanë kaluar kaq kohë, nuk jam aspak pishman dhe mund ta përsëris në çdo moment.

Blendi Fevziu: Megjithatë Zoti Teta a mendoni se Partia Aleanca Demokratike që iu kishte propozuar për postin e Ministrit të Brendshëm luajti një rol për largimin tuaj.

Perikli Teta: Patjetër. Unë pres mbledhjen e Partisë Aleanca Demokratike, por nuk ka patur kohë që të mblidhen, edhe pse ka patur ngjarje të tjera siç është formimi i qeverisë së re, grushti i shtetit, Kushtetuta. Siç duket pret ndonjë finale të kupës së kupave që të mblidhet. Unë kam një sërë problemesh me shumë drejtues të Aleancës Demokratike. Unë nuk kam bërë dy gjëra, ose ata kanë këto pretendime ndaj meje. Unë nuk kam pranuar lista me emra prej tyre për t’i futur në punë në Ministrinë e Rendit dhe unë kam hequr të gjithë ata që nuk kanë merituar të qëndrojnë në Ministrinë e Rendit dhe në njësitë e saj. Këto dy faktorë më kanë bërë mua të padëshirueshëm për ta.

Blendi Fevziu: Gjatë kohës që keni qenë ministër, keni patur presion nga PS për të vendosur njerëzit e saj në Ministrinë e Rendit?

Perikli Teta: Po të pyesësh të gjithë drejtorët e Ministrisë së Rendit Publik të thonë që na mbytën telefonët dhe janë të tmerruar nga telefonët. Kuptohet që me mua nuk e kanë patur këtë kurajo. E keqja e këtij shteti është ndërhyrja e deputetëve në punët e Ministrisë së Rendit. Që nga mëngjesi deri në darkë koridoret e mbushur me deputetë të cilët ndërhynin për gjëra të vogla, për emërime policësh, për patenta, për banalitete. Unë ia kam thënë troç që nuk ndërhy për gjëra të tilla. I kam mbledhur drejtorët dhe ata me xhentilesën e tyre nuk e bënin dot.

Blendi Fevziu: Megjithatë në këtë shoqëri, në këtë shtet ku deputetët ndërhyjnë për patenta ka patur disa probleme të mëdha që i takojnë Ministrisë së Rendit. Ju dështuat ashtu si paraardhësi juaj për grumbullimin e armëve. Mund të realizohet grumbullimi i armëve?

Perikli Teta: E shoh me pesimizëm duke parë një konferencë të Atlantikut. Nuk mblidhen armët me një diletantizëm të ekzekutivit. Është e vërtetë që unë dështova dhe paraardhësit e mi dështuan. U bë një ligj i cili parashikon që për një vit të bëhet grumbullimi i armëve. Ky ligj mbështetej në dy forma, në forcën dhe në vullnetin për mbledhjen e armëve. Ky ligj parashikon ngritjen e strukturave. Kjo duhet të kishte filluar që në fillim të Tetorit. Por papritmas ndodhen qeveritarët në një shoqatë dhe tregojnë historira dhe problemi fillon nga e para.

Blendi Fevziu: Kemi një nga momentet më pesimiste që ndihet në Shqipëri, rivendosja e rendit. Qytetarët nuk ndihen të qetë. Desha një përgjigje shkurt, a mendoni se ka shanse që rendi të stabilizohet shpejt?

Perikli Teta: Padyshim, me masat e mara, me platformat që ekzistojnë, rendi vendoset pa dyshimin më të vogël. Ne vuajmë nga ngadalësia e reformave nga qeveria. Ky është defekti i qeverisë Meksi, i qeverisë Nano dhe shpresoj të mos jetë e qeverisë Majko. Shpejtësia në zgjidhjen e problemeve është e domosdoshme për Shqipërinë. Ne kemi humbur shumë kohë.

Blendi Fevziu: Nëse rendi mund të stabilizohet, edhe kontrabanda mund të ndalet?

Perikli Teta: Patjetër. Kontrabandën e shoh sikur jemi më vonë se sa me rendin. Duhet të ishte vendosur.

Blendi Fevziu: A është ruajtur kjo kontrabandë nga njerëzit me pushtet politik?

Perikli Teta: Unë mendoj se përderisa nuk ka fakte të tilla as policia dhe as organe të tjera mendoj se jo që nuk bëhet, por nuk kemi fakte.

Blendi Fevziu: Po Kushtetuta Zoti Teta, pas dy javësh do të shkojmë në një referendum për Kushtetutën, pyetja ime është do të votoni po apo jo?  Dhe e dyta çfarë vërejtjesh keni?

Perikli Teta: Ne tani kemi njerëz që mund të bëjnë kushtetuta shumë të mira, kemi përvojë shumë të mirë, kemi bërë nja 10 projekte deri tani dhe iu kemi dhënë edhe një furçë qesharake që i ka bërë Venecia, që i ka miratuar të 10-ta. Ne nuk kemi vështirësi teknike për formulimin e Kushtetutës. Për mua Kushtetuta ka dy gjëra, aspektin formal, që është realizuar tashmë me një të metë të deputetëve, që bënin vërejtje në moment të fundit me ç’i kujtohej e ç’lexonin aty. Aspekti më i rëndësishëm i Kushtetutës është thelbi i saj, i cili nuk është vlerësuar si duhet. Kushtetuta është një dokument që duhet të plotësojë tre kushte: Të jetë dokument juridik, të jetë politik dhe marrëveshje ndërmjet shtetit dhe popullit. Fatkeqësia është që partitë politike janë trembur dhe e kanë braktisur Kushtetutën. Ato nuk pranojnë që Kushtetuta të jetë dokument politik dhe nuk kanë dalë dhe të zhvillojnë fushatë. Unë do të votoj pro dhe i ftoj të gjithë të votojnë pro.

Blendi Fevziu: Ndoshta ju vë në pozitë të vështirë, por doja t’iu pyesja me çfarë të ardhurash jetoni Zoti Teta?

Perikli Teta: Nuk më vë aspak në pozitë të vështirë. Që në ditët e para të marjes së detyrës jam thirrur nga parlamenti, duhet të kem thyer Guinness-in për thirrjet në parlament, krahasuar me të gjithë ministrant e botës. Për 5 muaj jam thirrur 11 herë, ndërkohë që ministrant e mëparshëm, në 5 vjet janë thirrur 6 herë. Dhe kam thënë që kam dy fëmijë, gruan dhe rrogën. Sot përsëri për fat të mirë kam dy fëmijë, gruan dhe pensionin. E konsideroj të mjaftueshëm, ka të tjerë që marin më pak.

Blendi Fevziu: Megjithatë në 14 Shtator, teksa ktheheshit nga Televizioni Shqiptar ku kishit mbajtur fjalimin për popullin keni pësuar një atentat, është qëlluar makina juaj dhe forcat që iu shoqëronin atë ditë ishin të shumta dhe i janë kundërpërgjigjur zjarrit dhe mesa di unë ka patur edhe një person të vrarë. A e ndjeni tani mungesën e rojeve dhe a ndiheni të kërcënuar?

Perikli Teta: Lidhur me atentatin nuk besoj të ishte një komplot, pra që të kishte persona nga ata të grushtit të shtetit që të jenë mbledhur dhe të jenë fiksuar për t’më vrarë. Pas datës 14 ka edhe informacione të tjera që kanë dashur të më bëjnë atentat në Ministrinë e Rendit, informacione të cilat unë nuk ia thashë zëvendësve të mi për të mos krijuar panik. Do kisha shumë dëshirë t’i shikoja ata persona, sepse nuk ka qenë vetëm një, sepse kanë qëlluar në dy drejtime. Pashë vetëm plumbat që binin në makinë para meje, ndjeva gomat që u shpuan.

Blendi Fevziu: Makina juaj ishte e blinduar?

Perikli Teta: Po e blinduar. Pashë atë personin që u rrëzua, pasi një nga personat që ishte me mua tha e vranë. Pashë edhe heroizmin dhe trimërinë e personave që më shoqëronin. Pashë tek ata një besnikëri që nuk do të harrohet nga unë për asnjë moment. I vetmi shqetësim që kisha ishte që të mos vritej ndonjë nga ata, sepse forca të tjera mund të organizoheshin dhe të bënin veprime të palejuara.

Blendi Fevziu: Tani e ndjeni mungesën e rojeve, të makinës apo shoqëruesve?

Perikli Teta: Nuk e ndjej, sepse të gjithë këta djem më marin në telefon, më pyesin si jam, më ftojnë për kafe dhe kategoria e tyre me të cilën shëtis përbën kënaqësi për mua, sepse janë një kategori që gjatë këtyre muajve që kam qenë ministër nuk më kanë telefonuar asnjëherë dhe kam shumë dëshirë të rri me ta.

Blendi Fevziu: Ndiheni i fyer, i përdorur apo i lodhur nga eksperienca juaj 15 mujore në qeveri, ose më gjërë, 8-vjeçare në politikë?

Perikli Teta: Shpesh më thonë a je i lodhur? Siç duket dinë që unë kam qenë ca kohë i sëmurë nga zemra edhe sidomos pas një artikulli që pashë ditët e para të Shtatorit ku shkruhej që në vend të zemrës kam ca tuba, më janë hequr të gjitha të brendshmet, fle në karrige, nuk shrihem. Po ta kishin lexuar kalamajtë do më kishin konsideruar si personazh të filmave horror. Po t’më shponin do të nxirrja vetëm xixa dhe tym. Është e vërtetë që kam bërë një operacion në zemër, 6 by pass-e në vitin ’95. Jam shumë mirë me shëndet, ha pak, fle 5 orë gjumë, nuk pi siç jam akuzuar. Bashkë për shembull pijmë vetëm çaj. Përsa i përket shëndetit jam shumë mirë dhe përsa i përket zemrës punon më mirë se zemra e shumë të rinjve.

A ndihem i përdorur? Jam ky që jam, kam një përvojë pune mbi 30 vjet në administratën shtetërore, kam kryer punë të ndryshme në drejtim të ndërmarrjeve dhe uzinave, kam qenë ministër, sekretar shteti, kam qenë deputet, kam një përvojë politike, nëse i duhem shtetit le të më përdorë, nuk jam i përkryer. Le t’më marin të mirat dhe jo të këqijat, po të duan le t’më përdorin, nuk e ndjej veten të përdorur.

A jam i fyer? Patjetër që jam. Këtë fyerje do ta përmendja me deputetët e Kuvendit Popullor. Jam i fyer për datën 8 Tetor, ditën e miratimit të qeverisë dhe programint të qeverisë. Jam thirrur po nga këta deputetë më 17 Shtator, jam pritur shumë mirë, isha i lumtur sepse lëvdohej policia që kishte kryer një akt madhor, kishte mbrojtur shtetin. Më datën 8, në paraqitjen e programit të qeverisë, nuk lanë gjë pa thënë për policinë, për rendin dhe vazhdojnë, ka një muaj e ca që thonë policia është e korruptuar, është e degjeneruar. Të gjithë këta pushtetarë, deputetë e çfarëdo qofshin duhet të kenë parasysh që nuk konfondohet institucioni me personin. Ata mund të shajnë Perikli Tetën, por jo policinë. Policia është e mrekullueshme, ka njerëz të mrekullueshëm. Ata kanë dhënë jetën vetëm vitin e fundit për mbrojtjen e rendit dhe qetësisë. Ata nuk janë kriminela, ata nuk janë kontrabandistë, ata janë njerëz të mrekullueshëm. Ata që i akuzojnë duhet të jenë të përgjegjshëm. Askush nuk është vjedhës pa fakte. Edhe policët kanë shumë mendime për deputetët, flasin ndërmjet tyre dhe thonë si ia bën ky deputet që me një rrogë, mban edhe celular, edhe një “Benz 5000”, kur të dyja sëbashku bëjnë sa rroga e tij. Por policët janë shumë më të kulturuar se këta deputetë dhe nuk i flasin këto publikisht, sepse nuk kanë fakte. Prandaj ajo që duhet bërë është të kemi besim tek policia, tek forcat e armatosura dhe këta do të jenë ata që po patëm mbështetjen e pozitës dhe opozitës, rendi do të vendoset shumë shumë shpejt. Ndryshe, nëse njëri do të shohë majtas dhe tjetri djathtas, koha për vendosjen e rendit do të largohet.

Blendi Fevziu: Zoti Teta unë ju falenderoj për bisedën e sotme, falenderoj edhe teleshikuesit që na kanë ndjekur duke iu thënë se do të rishihemi përsëri kësaj here në mes të javës, mbase ditën e enjte në mbrëmje, në një intervistë speciale, pak të veçantë dhe jo të inkuadruar në emisionin “E diela debat”. Zoti Teta faleminderit, shpresoj që do të shihemi përsëri në një detyrë të re, ose në një status të ri. Natën e mirë dhe mirupafshim.

Perikli Teta: Faleminderit.

*Ky material është pjesë përbërëse e arkivës së Televizionit Klan.