26-vjeçarja pranon se u pagua për t’u lidhur me Billën
Kjo është Adjola Lakra, vajza që bashkëpunoi në vrasjen e Hekuran Billës. Policia e ka arrestuar 26-vjeçaren, e cila rezulton se ka qenë e dashura e Billës prej 1 viti dhe nxori në pritë 40-vjeçarin.
Por grupi hetimor ka zbuluar se ajo njëkohësisht ka pasur lidhje edhe me Sebastian Malin, 22-vjeçarin e arrestuar për vrasjen.
Sebastian Mali ka orientuar vajzën për të nisur një lidhje me Hekuran Billën dhe për ta nxjerrë në pritë. Natën që ka ndodhur vrasja, 26-vjeçarja Adjola Lakra ka komunikuar me Hekuran Billën në telefon dhe kishin lënë për t’u takuar te Komuna e Parisit mbrëmjen e 11 Qershorit, pikërisht në vendin ku ndodhi vrasja.
Sipas hetuesve, Adjola ka njoftuar edhe Sebastian Malin, i cili mendohet se së bashku me Viktor Markun, dajën e tij, organizuan vrasjen.
Televizioni Klan ka zbardhur edhe dëshminë e vajzës, e cila ka pranuar se u pagua nga Sebastian Mali.
“Kam patur njohje me Sebastian Malin. Ai më ofroi para që të krijoja lidhje me Hekuran Billën. Prej 1 viti u lidha me të. Sebastianit i thashë që do takohesha atë natën që ndodhi vrasja, por nuk e dija çfarë do bënte”.
Dëshmia e vajzës është tashmë prova më e fortë që ka në dorë Prokuroria, që e lidh Viktor Markun dhe Sebastian Malin me vrasjen e Hekuran Billës.
Grupi hetimor thotë se ka në kërkim edhe një person tjetër, i cili mendohet se ka qenë shoferi në makinën që u përdor për ekzekutimin e Billës.
Vrasja dyshohet se ka ardhur për motive hakmarrje, pasi në vitin 2006 Hekuran Billa ka vrarë në Angli, Prel Markun, vëllain e Viktor Markut.
Tv Klan
