Ministrja e Mbrojtjes, Olta Xhaçka zhvilloi një vizitë pune në Komandën e Forcës së Bashkuar të Aleancës së Atlantikut të Veriut me qendër në Napoli, ku u prit nga komandanti i kësaj force, Admiral James Foggo, i cili është njëkohësisht edhe komandant i Forcave Detare të SHBA për Europën dhe Afrikën. Një prej zonave të përgjegjësisë së JFC në Napoli është edhe Ballkani Perëndimor.

Gjatë takimit, ministrja Xhaçka siguroi Admiralin amerikan se vendi ynë do të vazhdojë të promovojë politikën e dyerve të hapura dhe të bashkëpunimit mes vendeve të rajonit.

“Shqipëria është e vendosur të jetë qendër e paqes, sigurisë dhe stabilitetit në Ballkanin Perëndimor si dhe zëri kryesor për vlerat dhe aspiratat euroatlantike të vendeve të rajonit, duke përfshirë Kosovën. Në funksion të një rajoni më të sigurt e të mbrojtur nga kërcënimet që vijnë nga Rusia, për Ballkanin Perëndimor e ardhmja e vetme është orientimi drejt Perëndimit”

, tha ministrja Xhaçka në takimin me Admiral Foggo.

Për komandantin e Forcës së Bashkuar, Shqipëria përmes pjesëmarrjes në misionet paqeruajtëse të NATO si dhe rolin e saj aktiv në rajon, ka treguar se është një anëtare e denjë e aleancës dhe kontribuese për paqen dhe sigurinë.

“Kontributi dhe roli i Shqipërisë për bashkëpunimin mes vendeve të rajonit është mbresëlënës”

, tha Admiral Foggo gjatë bashkëbisedimit me ministren e Mbrojtjes.

Në kuadër të kësaj është edhe konferenca rajonale e Ballkanit Perëndimor dhe Detit të Zi që do të zhvillohet në Tiranë gjatë muajit Maj.

/tvklan.al