Zaev: Jemi në një valë të re të pandemisë



Zaev: Jemi në një valë të re të pandemisë

18:15 05/03/2021

“Presim propozimin e komisionit për ashpërsimin e masave”

Kryeministri Zaev dhe Ministri i Shëndetësisë, Venko Filipçe, në një vijë me qëndrimet e tyre, paralajmërojnë se vaksinimi masiv do të fillojë gjatë Marsit. Krahas optimizmit se do të arrijnë vaksina nga mekanizma të ndryshëm dhe nga të katër anët, Kryeministri Zaev, nuk mundi me siguri ta konfirmojë as sasinë e parë të 3.000 vaksinave ruse.

“Të dielën i presim 3,000 vaksinat të arrijnë përmes DHL, ministri organizohet me ambasadorin që t’i presin. 97 mijë të tjerat mbesin pastaj nga java tjetër e kështu me rradhë. 21,000 nga Fajzeri janë konfirmuar për në fund të muajit Mars, marrëveshja përfundimisht ka arritur. Në muajin Mars do të fillojë vaksinimi masiv, krahas punonjësve shëndetësorë, siç është sipas protokolleve, janë personat e moshuar, personat me sëmundje kronike”.

Disa herë gjatë javës së kaluar, për shkak të rritjes së infektimeve të reja dhe shqetësimeve nga virusi britanik, autoritetet e shëndetësisë nuk e kanë përjashtuar mundësinë e ashpërsimit të masave anti-covid. Kryeministri pranoi se vendi gjendet në mes të një piku të ri, por për masat, topin e hedh tek Komisioni për Sëmundje Infektive.

“Kemi një rritje të re, gjegjësisht pik të ri, do të ndiqet situata edhe sot edhe gjatë fundjavës që të ketë një raport përfundimtar për të Hënën në mëngjes, që të mund të sjellim vendime. Nuk prejudikoj nëse do të ketë ose jo, të shohim se çfarë do të thonë numrat dhe cili do të jetë propozimi i Komisionit për Sëmundje Infektive”.

Autoritetet e Shëndetësisë në Maqedoninë e Veriut, për shkak të ngarkimit të kapaciteteve spitalore, sërish kanë vënë në funksion spitalin mobil pranë Klinikës Infektive në Shkup.

Ky spital mobil, pacientët e parë filloi t`i pranojë më 20 Tetor të vitit të kaluar, kur filloi kulminacioni i valës së vjeshtës. Pas dy muaj e gjysmë, me zvogëlimin e numrit të të prekurve, u mbyll në fillim të Janarit të këtij viti. Aktualisht nëpër covid-qendrat e vendit trajtohen afër 800 pacientë. 

Klan Macedonia







Të ngjashme